مدھیہ پردیش: سنگرولی میں 70 فٹ گہرے بورویل میں گرے معصوم بچے کو محفوظ نکالا گیا

مدھیہ پردیش میں سنگرولی ضلع کے چترنگی گڑھ وا تھانہ علاقے کے كھیڈور گاؤں میں بورویل میں گرے دو سال کے بچے کو بچا لیا گیا ہے، 70 فٹ گہرے بورویل میں گرے معصوم بچے کو ریسکیو آپریشن کی ٹیم نے باہر نکال لیا ہے، راحت کی بات یہ ہے کہ بچہ محفوظ ہے، بتایا جا رہا ہے کہ صبح کھیلتے وقت یہ بچہ بورویل میں گر گیا تھا، جس بورویل بچہ گرا تھا وہ اس کے والد کا ہی ہے۔

بچے کے بورویل میں گرنے کی خبر کے بعد آس پاس کے لوگ بڑی تعداد میں جمع ہو گئے، مقامی لوگوں کی اطلاع پر پولس انتظامیہ کی ٹیم موقع پر پہنچی تھی، بچے کو بورویل سے باہر نکالنے کے لئے ریسکیو آپریشن شروع کرتے ہوئے بورویل کے پاس جے سی بی مشین کی مدد سے ایک بڑا کھڈا کھودا گیا تھا جہاں سے اس بچے کو محفوظ باہر نکالا گیا ہے۔

ریسکیو آپریشن کے دوران بچے کے اہل خانہ کا رو رو کر برا حال ہو رہا تھا، بچے کے بورویل سے باہر نکلنے کے بعد اہل خانہ کے ساتھ انتظامیہ کی ٹیم نے بھی راحت کی سانس لی ہے۔

ملک میں اس سے پہلے بورویل میں گرنے سے بہت سے بچوں کی جان جا چکی ہے، اسے لے کر سپریم کورٹ نے کچھ گائڈلائنس بھی جاری کی تھی، لیکن عدالت عظمیٰ کی گائڈلائنس کے باوجود لوگ غفلت برتتے ہیں اور بورویل کو کھلا چھوڑ دیتے ہیں، جس کی وجہ سے اس طرح کے حادثے اکثر ہوتے رہتے ہیں۔