پرینکا گاندھی نے کانپور میں کیا روڈ شو، امیٹھی میں لیا انتخابی تیاریوں کا جائزہ

کانگریس کی قومی جنرل سیکریٹری پرینکا گاندھی نے جمعہ کے روز کانپور میں روڈ شو کیا۔ انہوں نے یہاں سے کانگریس کے امیدوار شری پرکاش جائسوال کے حق میں ووٹ دینے کی اپیل کی۔

کانپور پہنچنے پر پرینکا گاندھی کا چکیریئر پورٹ پر پارٹی کارکنان نے استقبال کیا اس کے بعد وہ کار کے ذریعے گھنٹہ گھر پہنچیں، جہاں سے انہوں نے روڈ شو کی شروعات کی۔ اس کے بعد وہ پھول باغ پہنچیں جہاں انہوں نے ایک جلسہ عام سے خطاب کیا۔ ان کا روڈ شو بڑے چوراہے پر اختتام پزیر ہوا۔

گھنٹہ گھر پر ایک جلسہ سے خطاب کرتے ہوئے پرینکا گاندھی نے کہا کہ ’’یہ انقلابیوں کی سرزمین ہے ۔ اس شہر سے ہماری دادی اور والد کا گہرا ناطہ ہےاور یہ میرا مائیکا ہے، لہذا آپ اپنی بیٹی کی باتیں سنیں اور لوک سبھا انتخابات میں جھوٹ کے بجائے سچائی کے حق میں ووٹ کریں۔‘‘

روڈ شو کے دوران سڑک کے دونوں طرف بھاری تعداد میں لوگ جمع تھے یہاں تک کہ گھروں کی چھتوں پر بھی ہجوم نظر آ رہا تھا۔ پرینکا گاندھی نے لگاتار لوگوں کو ہاتھ ہلا کر خیرمقدم کیا۔

پرینکا گاندھی نے آج ہی امیٹھی کا بھی دورہ کیا ، جہاں 2017 اسمبلی انتخابت کے دوران بی جے پی کا دامن تھام لینے والے وجے پاسی نے پرینکا کی موجودگی میں کانگریس میں شمولیت اختیار کر لی۔ اسے بی جے پی کے لئے بڑا جھٹکا قرار دیا جا رہا ہے۔

امیٹھی میں انتخابی کارروائیوں کا جائزہ

قبل ازیں پرینکا گاندھی نے پارٹی صدر اور اپنے بھائی راہل گاندھی کے پارلیمانی حلقہ انتخاب امیٹھی کا دورہ کیا۔ یہاں انہوں نے گوری گنج میں اقع راطہ عامہ کے دفتر میں پارٹی کارکنان اور رہنماؤں سے بات چیت کر کے انتخابی تیاریوں کا جائزہ لیا۔ اس دوران راجیہ سبھا کے سابق رکن پرمود تیواری، ایم ایل سی دیپک سنگھ کے ساتھ کئی عوامی نمائندگان موجود رہے۔

ایم ایل سی دیپک سنگھ نے بتایا کہ پرینکا گاندھی نے زونل، ضلع، پنچایت اور بوتھ سطح کے کارکنان سے میٹنگ کی اور امیٹھی کی صورت حال پر معلومات لیں۔ دیپک کے مطابق پرینکا گاندھی نے تمام کارکنان سے بوتھ کو مضبوط کرنے کو کہا ہے۔ ساتھ ہی انہوں نے کانگریس حکومت کے کام کی تشہیر کر کے ووٹ مانگنے کے لئے کہا۔