عام انتخابات LIVE: نوٹ بندی معاشی پاگل پن تھا... راہل گاندھی

پنجاب کے لدھیانہ میں انتخابی ریلی سے خطاب کرتے ہوئے کانگریس صدر راہل گاندھی نے کہا کہ ’’نوٹ بندی معاشی پاگل پن تھا۔ نوٹ بندی سے چھوٹے تاجروں کو کافی نقصان پہنچا۔ لدھیانہ چھوٹی صنعتوں کا سنٹر ہے۔ یہاں کے چھوٹے تاجروں کو نوٹ بندی سے کافی نقصان ہوا۔‘‘

کانگریس صدر نے عوام سے خطاب کرتے ہوئے کہا کہ ’’نریندر مودی چاہتے ہیں کہ چھوٹے تاجر مر جائیں اور بڑے صنعت کار زندہ رہیں۔ پی ایم مودی کے ذریعہ نافذ نوٹ بندی کا یہی مقصد تھا۔ پی ایم مودی نے پانچ سالوں تک عوام سے ناانصافی کی۔ اب ہم ’نیائے‘ سے لوگوں کے ساتھ انصاف کریں گے۔‘‘ انھوں نے مزید کہا کہ ’’نیائے منصوبہ کے تحت ہم ملک کے 20 فیصد سب سے غریب لوگوں کو ان کے اکاؤنٹ میں 72 ہزار روپے سالانہ ڈالیں گے۔‘‘

مغربی بنگال کی وزیر اعلیٰ ممتا بنرجی کی فوٹو شاپ سے بگاڑی گئی تصویر سوشل میڈیا پر شیئر کرنے کے الزام میں جیل بھیج دی گئی بی جے پی یوتھ وِنگ کی کنوینر پرینکا شرما جیل سے چھوٹ گئی ہیں۔ سپریم کورٹ نے منگل کو پرینکا شرما کو ضمانت پر آزاد کرنے کا حکم دیا تھا۔ جیل سے باہر آنے کے بعد میڈیا سے بات کرتے ہوئے پرینکا نے کہا کہ ’’میری ضمانت کے لیے عدالت سے کل ہی منظوری مل گئی تھی، لیکن اس کے باوجود مجھے آزاد کرنے میں 18 گھنٹے کی تاخیر کی گئی۔ مجھے میری فیملی اور میرے وکیل سے نہیں ملنے دیا گیا۔ مجھ سے زبردستی معافی نامہ پر دستخط کرائے گئے۔‘‘ پرینکا شرما نے مزید کہا کہ ’’میں اس کیس کو لڑوں گی اور میں نے ایسا کچھ نہیں کیا ہے، جس کے لیے مجھے معافی مانگنی پڑے۔ اس لیے میں معافی نہیں مانگوں گی۔‘‘

مغربی بنگال کے ہاوڑا میں ریلی رَد ہونے کے باوجود اتر پردیش کے وزیر اعلیٰ یوگی آدتیہ ناتھ نے وہاں جانے کا اعلان کیا ہے۔ وزیر اعلیٰ یوگی آدتیہ ناتھ نے ٹوئٹ کر کہا کہ آج میں آ رہا ہوں۔ انھوں نے یہ بھی کہا کہ اب گزارش نہیں جنگ ہوگی۔ یوگی نے ’جے شری رام‘ لکھنے کے ساتھ ٹوئٹ شروع کیا اور لکھا کہ وہ بنگال کے لوگوں کے درمیان پہنچ رہے ہیں۔

قابل ذکر ہے کہ مغربی بنگال کے ہاوڑا میں 15 مئی یعنی آج وزیر اعلیٰ یوگی آدتیہ ناتھ کو پہنچنا تھا۔ یہاں ان کی بیہالہ علاقے میں جیمس لاگ سارانی میں ایک ریلی مجوزہ تھی، لیکن مقامی انتظامیہ نے ریلی کی جو اجازت دی تھی وہ منگل کے روز واپس لے لی گئی۔ ریلی کی اجازت نہ ملنے کے بعد بھی یوگی آدتیہ ناتھ نے بنگال جانے کا اعلان کر دیا تھا جس سے ریاست کے ماحول میں کشیدگی دیکھنے کو مل رہی تھی۔ اس درمیان بی جے پی نے الزام عائد کیا کہ اسٹیج بنانے والے مزدوروں کو پیٹا گیا اور اب اسٹیج نہیں بن سکتا اس لیے ریلی رد کر دی گئی۔ بہر حال، اب ایک بار پھر یوگی آدتیہ ناتھ نے بنگال پہنچنے کے عزم کا اظہار کیا ہے۔

کولکاتا میں روڈ شو کے دوران تشدد کے معاملے میں بی جے پی صدر امت شاہ کے خلاف کولکاتا پولس نے دو ایف آئی آر درج کی ہیں۔ اس درمیان خبریں یہ بھی موصول ہو رہی ہیں کہ تیجندر پال سنگھ بگّا سمیت بی جے پی کے کئی لیڈر کو پولس نے حراست میں لے لیا ہے۔ یہ الزام بی جے پی لیڈر امت مالویہ نے عائد کیا ہے۔ دوسری طرف کولکاتا تشدد کے لیے بی جے پی نے ترنمول کانگریس کو قصوروار ٹھہرایا ہے۔ بی جے پی اس سلسلے میں آج جنتر منتر پر احتجاجی مارچ نکالے گی۔

کولکاتا میں بدھ کی شام ہوئے تشدد کا ایک ویڈیو منظر عام پر آیا ہے جس میں صاف نظر آ رہا ہے کہ بی جے پی کا پرچم اٹھائے بھگوا بریگیڈ کس طرح توڑ پھوڑ مچا رہی ہے اور پتھراؤ کر رہی ہے۔ مغربی بنگال میں پولنگ کے دوران تشدد کے واقعات تو ہوئے ہی، بی جے پی اور ترنمول کانگریس کارکنان پولنگ کے بعد بھی ایک دوسرے کے خلاف تشدد برپا کرنے میں لگے ہوئے ہیں۔ بی جے پی کارکنان نے تو اپنی سبھی حدیں پار کر کرھی ہیں۔

ہریانہ کے جھجر میں ایک شخص نے اس وقت اپنے چچا زاد بھائی کو گولی مار دی جب اسے پتہ چلا کہ اس کے چچازاد بھائی نے کانگریس کو ووٹ دیا ہے۔ پولس نے بتایا کہ ملزم بی جے پی حامی ہے۔ پولس نے کیس درج کر کے معاملہ کی جانچ شروع کر دی ہے۔