اہم خبریں LIVE: یوپی حکومت نے 17 آئی اے ایس افسران کا کیا تبادلہ

اتر پردیش حکومت کی طرف سے جمعرات کو پھر 17 آئی اے ایس افسران کا تبادلہ کیا گیا ہے۔ ان تبادلوں میں اسپیشل سکریٹری، کمشنر اور چیف ڈیولپمنٹ افسر سطح کے افسران شامل ہیں۔ حکومت کی طرف سے آج جاری افسران کے تبادلوں کی فہرست کے مطابق بریلی، سدھارتھ نگر، مظفر نگر، سون بھدر کے چیف ڈیولپمنٹ افسر (سی ڈی او) بدلے ہیں۔ وہیں پریاگ راج، جھانسی اور میرٹھ کے سٹی کمشنر بدلے گئے ہیں۔

ہندوستان اور جنوبی افریقہ کے درمیان ٹی-20 سیریز کا پہلا میچ آج دہلی کے ارون جیٹلی اسٹیڈیم میں کھیلا جا رہا ہے۔ ٹاس جیت کر جنوبی افریقہ نے پہلے گیندبازی کرنے کا فیصلہ کیا تھا اور ہندوستانی بلے بازوں نے دھواں دھار کھیل دکھاتے ہوئے 20 اوور میں 4 وکٹ کے نقصان پر 211 رن بنا لیے ہیں۔ یعنی جنوبی افریقہ کے سامنے جیت کے لیے 212 رنوں کا پہاڑ رکھا ہے۔ ہندوستان کی طرف سے سب سے زیادہ رن اوپننگ بلے باز ایشان کشن (48 گیندوں پر 76 رن) نے بنائے۔ شریئس ایر نے 27 گیندوں میں 36 رن اور کپتان رشبھ پنت نے 16 گیندوں میں 29 رن بنائے۔ آخر میں ہاردک پانڈیا نے محض 12 گیندوں پر ناٹ آؤٹ طوفانی 31 رن بنائے۔ ریتوراج گائیکواڈ نے 15 گیندوں پر 23 رن کا تعاون دیا۔ دنیش کارتک 2 گیندوں پر ایک رن بنا کر ناٹ آؤٹ رہے۔ جنوبی افریقہ کی طرف سے کیشو مہاراج، وین پارنیل، اینرک نارخیا اور ڈوین پریٹورین کو 1-1 وکٹ حاصل ہوا۔

مہاراشٹر کی ٹھانے واقع بھیونڈی سٹی پولیس نے معطل بی جے پی لیڈر نوین کمار جندل کو 15 جون کو ان کے سامنے پیش ہونے کے لیے سمن جاری کیا ہے۔ ان کے خلاف بھیونڈی سٹی تھانے میں تعزیرات ہند کی دفعہ 295 اے (قصداً اور غلط نیت سے کیا گیا کام، مذہبی جذبات کو مجروح کرنے کا ارادہ) کے تحت معاملہ درج کیا گیا ہے۔

پاکستان کے سابق رکن قومی اسمبلی (ایم این اے) اور مقبول ٹیلی ویژن میزبان عامر لیاقت کراچی میں پراسرار حالات میں انتقال کر گئے۔ مقامی میڈیا نے جمعرات کو یہ خبر دی۔ عامر لیاقت کی عمر 49 سال تھی۔ جیو ٹی وی کے مطابق لیاقت کو بدھ کی رات تکلیف محسوس ہوئی تاہم انہوں نے اسپتال جانے سے انکار کر دیا۔

الیکشن کمیشن آف انڈیا نے صدارتی انتخاب کی تاریخوں کا اعلان کر دیا ہے۔ کمیشن کے مطابق 18 جولائی کو ووٹنگ ہوگی اور 21 جولائی کو ووٹوں کی گنتی کی جائے گی۔

چیف الیکشن کمشنر راجیو کمار نے اطلاع دیتے ہوئے بتایا کہ صدارتی انتخاب کے لئے 15 جون کو نوٹیفکیشن جاری کیا جائے گا۔ نامزدگیاں داخل کرنے کی آخری تاریخ 29 جون ہوگی۔ 30 جون کو کاغذات کی جانچ پڑتال کی جائے گی۔ 2 جولائی تک امیدوار اپنی نامزدگی واپس لے سکتے ہیں۔ خیال رہے کہ صدر کووند کی مدت کار 24 جولائی 2022 کو ختم ہونے جا رہی ہے۔

الیکشن کمشنر نے بتایا کہ صدارتی انتخابات 2022 میں کل 4809 ووٹر ووٹ ڈالیں گے۔ کوئی بھی سیاسی پارٹی اپنے اراکین کے لئے وہپ جاری نہیں کر سکتی۔

گولڈ اسملنگ معاملہ پر کانگریس پارٹی کیرالہ کے وزیر اعلیٰ پنرائی وجین کے خلاف سراپا احتجاج بنی ہوئی ہے۔ کانگریس لیڈران اور کارکنان نے آج ترواننت پورم سیکریٹریٹ پر مظاہرہ کیا۔ اس دوران پولیس نے یوتھ کانگریس کے کارکنان کو منتشر کرنے کے لئے پانی کی بوچھاڑ کی۔ مہیلا کانگریس کی کارکنان نے بھی وجین کے خلاف نعرے بازی کی۔

دہلی پولیس کے خصوصی سیل نے اشتعال انگیز بیان بازی کے سلسلہ میں نوپور شرما اور دیگر افراد کے خلاف ایف آئی آر درج کی ہے۔ اے این آئی کے مطابق اس ایف آئی آر میں مجلس اتحاد المسلمین کے سربراہ اسد الدین اویسی کو بھی نامزد کیا گیا ہے۔ اس کے علاوہ نتی ایف آئی آر میں نرسنگھا نند کا نام نام بھی شمال ہے۔

دہلی کے بٹلا ہاؤس علاقہ میں آگ لگنے کا واقعہ رونما ہوا ہے۔ فائر بریگیڈ کی 7 گاڑیاں موقع پر پہنچی ہیں اور اہلکار آگ پر قابو پانے کی کوشش کر رہے ہیں۔ دریں اثنا، کم از کم 20 افراد کو بحفاظت نکال لیا گیا ہے۔ فائر بریگیڈ کے مطابق آگ پر اب قابو پا لیا گیا ہے۔

دہلی میٹرو کی بلیو لائن خدمات تکنیکی خرابی کی وجہ سے متاثر ہوئی ہیں۔ جس کی وجہ سے صبح دفتر جانے والے مسافروں کو پریشانی کا سامنا کرنا پڑ رہا ہے۔ بلیو لائن دہلی کے دوارکا سیکٹر-21 اور اتر پردیش کے نوئیڈا الیکٹرانک سٹی اور غازی آباد میں ویشالی کو جوڑتی ہے۔