کشمیر: 24 گھنٹوں میں سی آر پی ایف کے دو افسروں نے کی خودکشی

سری نگر: وادی کشمیر میں گزشتہ 24 گھنٹوں کے دوران دو الگ الگ اضلاع میں تعینات سینٹرل ریزرو پولیس فورس (سی آر پی ایف) کے دو افسروں نے خودکشی کر کے اپنی زندگیاں ختم کی ہیں۔ سی آر پی ایف افسروں کی خودکشی کے یہ واقعات اننت ناگ اور سری نگر اضلاع میں رونما ہوئے ہیں۔

جنوبی کشمیر کے ضلع اننت ناگ کے مٹن علاقے میں تعینات سی آر پی ایف کے ایک سب انسپکٹر نے پیر کے روز اپنی ہی بندوق سے اپنی زندگی تمام کردی۔ مہلوک کی شناخت فتح سنگھ ولد ایدان سنگھ ساکنہ جیسلمیر راجستھان کے بطور ہوئی ہے۔ ایک مقامی خبر رساں ایجنسی نے سرکاری ذرائع کے حوالے سے کہا ہے کہ مہلوک افسر نے اپنی لاش کے پاس ایک سوسائیڈ نوٹ چھوڑا تھا جس میں انہوں نے لکھا تھا کہ 'کوئی میری لاش کو ہاتھ نہ لگائے کیونکہ مجھے ڈر ہے کہ شاید میں کورونا وائرس میں مبتلا ہوں'۔

پولیس ذرائع نے بتایا کہ مہلوک سب انسپکٹر کے نمونے لئے گئے ہیں اور لاش کا پوسٹ مارٹم بھی کیا گیا ہے۔ انہوں نے کہا کہ رپورٹ آنے کے بعد ہی کہا جاسکتا ہے کہ آیا مہلوک افسر کورونا وائرس سے متاثر تھے یا نہیں۔ ادھر سری نگر کے کرانگر علاقے میں سی آر پی ایف کے ہی ایک اسسٹنٹ سب انسپکٹر نے بھی منگل کی صبح اپنی ہی بندوق سے اپنا خاتمہ کر لیا۔

سری نگر میں تعینات سی آر پی ایف کے ترجمان پنکج سنگھ نے یو این آئی اردو کو بتایا کہ سی آر پی ایف کی 49 ویں بٹالین سے وابستہ سب انسپکٹر نے اپنی ہی بندوق سے اپنی زندگی تمام کرلی ہے۔ انہوں نے مہلوک افسر کی شناخت بنگالی بابو ساکنہ گوالیار مدھیہ پردیش کے بطور کی ہے۔ موصوف ترجمان نے مہلوک کی موت میں کورونا وائرس کے عمل دخل کو خارج از امکان قرار دیتے ہوئے کہا کہ لاک ڈاؤن ہے اور بازاروں میں کوئی رونق ہی نہیں ہے۔ ایسا منظر ملک اور دنیا نے کبھی دیکھا ہی نہیں ہے۔

قابل ذکر ہے کہ سیکورٹی اداروں کی جانب سے یوگا اور آرٹ آف لیونگ کی سرگرمیاں متعارف کرانے کے باوجود بھی جموں وکشمیر میں تعینات سیکورٹی فورس اہلکاروں میں خودکشی کے رجحان میں کوئی کمی نہیں آرہی ہے۔ مرکزی وزیر مملکت برائے دفاع شریپد نائیک نے گزشتہ برس دسمبر میں لوک سبھا میں فوجی جوانوں کی طرف سے خودکشیاں کرنے کی تفصیلات فراہم کرتے ہوئے کہا کہ ملک میں سال 2010 سے سال 2019 کے دوران 1113 فوجی اہلکاروں نے خودکشی کی۔