کارگل وجے دیوس: وزیر اعظم مودی، صدر جمہوریہ مرمو، کانگریس صدر کھڑگے اور اپوزیشن رہنما راہل گاندھی کا فوج کو خراج عقیدت

’کارگل وجے دیوس‘ پر پورا ملک ہندوستانی فوج کے بہادر جوانوں کی شجاعت اور دلیری کو سلام پیش کر رہا ہے۔ اس موقع پر صدر جمہوریہ دروپدی مرمو، وزیر اعظم نریندر مودی، کانگریس صدر ملکارجن کھڑگے اور لوک سبھا میں حزب اختلاف کے قائد راہل گاندھی نے بھی بہادر جانبازوں کو خراج عقیدت پیش کیا ہے۔ صدر جمہوریہ دروپدی مرمو نے سوشل میڈیا پلیٹ فارم ’ایکس‘ پر لکھا کہ ’’کارگل وجے دیوس کے موقع پر میں مادر وطن کے دفاع کے لیے اپنی جان کا نذرانہ پیش کرنے والے بہادر سپاہیوں کو خراج عقیدت پیش کرتی ہوں۔ ان کی بے مثال بہادری، غیر متزلزل عزم اور بے لوث حب الوطنی ہماری مسلح افواج کی شاندار روایات کی روشن مثال ہے۔ قوم ہمیشہ ان کی قربانیوں کی مقروض رہے گی۔ ہمارے ان عظیم جانبازوں کی شجاعت کی داستانیں آنے والی نسلوں کو وطن کی خدمت، فرض شناسی اور ایثار کے جذبے کے ساتھ آگے بڑھنے کی مسلسل ترغیب دیتی رہیں گی۔‘‘

وزیر اعظم نریندر مودی نے سوشل میڈیا پلیٹ فارم ’ایکس‘ پر لکھا کہ ’’کارگل وجے دیوس کے موقع پر پوری قوم ہندوستان کے بہادر فوجیوں کی غیر معمولی بہادری اور ملک کی سلامتی کے لیے ان کی بے مثال وابستگی پر انہیں خراج تحسین پیش کرتی ہے۔‘‘ انہوں نے مزید لکھاکہ ’’انتہائی دشوار حالات میں ان کی جرأت و شجاعت ہمیشہ قوم کے لیے باعث فخر رہے گی۔ ان کی غیر متزلزل حب الوطنی اور فرض سے بے لوث وابستگی آنے والی نسلوں کو ہمیشہ وطن کی خدمت اور قومی ذمہ داری کے جذبے سے سرشار کرتی رہے گی۔‘‘

کانگریس کے قومی صدر ملکارجن کھڑگے نے ’ایکس‘ پر لکھا کہ ’’کارگل وجے دیوس کے موقع پر ہمارے بہادر فوجیوں، ان کے اہل خانہ اور تمام اہل وطن کو مبارک باد۔ کارگل جنگ میں مادر وطن کے دفاع کے لیے عظیم ترین قربانی پیش کرنے والے ہمارے امر جانبازوں کو ہم عقیدت کے ساتھ سلام پیش کرتے ہیں۔ ان کی بے مثال جرأت، غیر معمولی بہادری اور وطن کے لیے غیر متزلزل وابستگی ہمیشہ ہم سب کے لیے مشعل راہ اور باعث تحریک رہے گی۔ جے ہند۔‘‘

’کارگل وجے دیوس‘ کے موقع پر لوک سبھا میں حزب اختلاف کے قائد راہل گاندھی ’ایکس‘ پر لکھتے ہیں کہ ’’کارگل وجے دیوس کے موقع پر ہندوستان کی سرحدوں کے دفاع میں اپنی جان کا عظیم نذرانہ پیش کرنے والے تمام بہادر جوانوں کو ہم خراج عقیدت پیش کرتے ہیں۔ قوم آپ کی جرأت، شجاعت اور عظیم قربانی کی ہمیشہ مقروض رہے گی۔‘‘