دوران پرواز پائلٹ کی لاپروائی، مسافروں کے ناک-کان سے بہا خون، ایمرجنسی لینڈنگ

نئی دہلی: جیٹ ایئر ویز کے ممبئی سے جے پور جا رہے طیارے میں پائلٹ بليڈ سوئچ آن کرنا بھول گئے جس کی وجہ سے 30 مسافروں کی ناک سے خون بہنے لگا اور بہت سے دوسرے مسافر بیمار ہو گئے۔ طیارے کو آدھے راستے سے ہی واپس ممبئی لانا پڑا۔

جیٹ ایئر ویز کی پرواز نمبر 9 ڈبلیو-697 میں اس وقت 166 مسافر اور عملے کے پانچ رکن سوار تھے۔ ہوائی جہاز ممبئی میں محفوظ طریقے سے اترا اور بیمار مسافروں کو طبی سہولت فراہم کی گئی۔ اس معاملے کی رپورٹ سول ایوی ایشن ڈائریکٹوریٹ جنرل (ڈی جی سی اے) کو دے دی گئی ہے اور تفتیش مکمل ہونے تک دونوں پائلٹوں کو ڈیوٹی سے ہٹا دیا گیا ہے۔

ڈی جی سی اے نے بتایا کہ یہ بوئنگ کا بی-737 طیارہ تھا۔ پرواز کرتے وقت بليڈ سوئچ کو آن نہ کرنے کی وجہ سے کیبن کے اندر ہوا کا دباؤ کافی کم ہو گیا تھا جس کی وجہ سے 30 مسافروں کی ناک سے خون بہنے لگا اور بہت سے دوسرے مسافروں نے سر اور کان میں درد کی شکایت کی۔ اس دوران مسافروں کی سیٹ کے اوپر لگے آکسیجن ماسک اپنے آپ کھل گئے۔

پائلٹ نے صورت حال کی سنگینی کو دیکھتے ہوئے طیارے کو واپس ممبئی ہوائی اڈے پر اتارنے کا فیصلہ کیا جہاں ڈاکٹروں کی ایک ٹیم پہلے سے وہاں موجود تھی۔ جیٹ ایئر ویز نے ایک بیان جاری کرکے اس واقعہ پر افسوس ظاہر کیا ہے۔ جیٹ ایئرویز کے ترجمان نے بتایا کہ متبادل پرواز 144 مسافروں کے ساتھ جے پور روانہ ہو چکی ہے۔