امت شاہ کے ’شاہین باغ‘ والے بیان پر جے ڈی یو نائب صدر کا جوابی حملہ

دہلی میں 8 فروری کو ووٹنگ ہونی ہے۔ اس سے پہلے مرکزی وزیر داخلہ امت شاہ اور ان کی پارٹی کے لیڈر شہریت قانون، این آر سی اور این پی آر کے ایشو پر عوام کو بانٹ کر انتخاب جیتنے کا خواب دیکھ رہے ہیں۔ اُدھر بی جے پی کی حلیف پارٹی کے لیڈر ہی اس ایشو پر بی جے پی اور مرکز کی مودی حکومت پر جوابی حملہ کر رہے ہیں۔ اتوار کے روز وزیر داخلہ امت شاہ کے ذریعہ دہلی کے بابر پور میں دیئے گئے بیان پر بہار میں بی جے پی کی ساتھی پارٹی جے ڈی یو کے نائب صدر پرشانت کشور نے جوابی حملہ کیا ہے۔

پرشانت کشور نے ٹوئٹ کر کے کہا ہے کہ ’’8 فروری کو دہلی میں ای وی ایم کا بٹن تو پیار سے ہی دبے گا۔ زور کا جھٹکا دھیرے سے لگنا چاہیے تاکہ آپسی بھائی چارہ اور خیر سگالی خطرے میں نہ پڑے۔‘‘ جے ڈی یو نائب صدر نے مزید لکھا کہ ’’انصاف، آزادی، یکسانیت اور بھائی چارہ۔‘‘

واضح رہے کہ دہلی کے بابر پور میں اتوار کو وزیر داخلہ امت شاہ نے ایک جلسہ عام کو خطاب کرتے ہوئے کہا تھا کہ ای وی ایم کا بٹن اتنے غصے کے ساتھ دبانا کے بٹن یہاں بابر پور میں دبے اور کرنٹ شاہین باغ میں لگے۔ امت شاہ اتنے پر ہی خاموش نہیں ہوئے، آگے انھوں نے یہ بھی کہہ دیا کہ سی اے اے کی مخالفت کرنے والے لیڈروں نے دہلی میں فساد کروائے اور لوگوں کو گمراہ کرنے کا کام کیا ہے۔ امت شاہ کے اسی بیان پر پرشانت کشور نے جوابی حملہ کیا ہے۔

ایسا پہلی بار نہیں ہے جب بی جے پی کی حلیف جماعت کے نائب صدر پرشانت کشور نے اس ایشو پر مودی حکومت اور ان کے وزراء پر نشانہ سادھا ہے۔ اس سے پہلے بھی کئی بار پرشانت کشور سی اے اے، این پی آر اور این آر سی کے ایشو پر نشانہ سادھ چکے ہیں۔ وہ کھل کر اس ایشو پر مرکز کی مودی حکومت کی مخالفت کر رہے ہیں۔