جمشیدپور میں موسلادھار بارش سے رہائشی اسکول زیر آب، 162 بچے رات بھر چھت پر پھنسے رہے، انتظامیہ نے کیا ریسکیو

جمشیدپور: جھارکھنڈ کے ضلع مشرقی سنگھ بھوم (جمشیدپور) کے کووالی تھانہ علاقے میں ہفتے کی رات سے جاری موسلادھار بارش نے تباہی مچا دی۔ لگاتار بارش کے باعث مقامی گڈرا ندی کا پانی خطرے کے نشان سے اوپر چلا گیا، جس کے نتیجے میں ندی کا پانی پانڈر شولی گاؤں میں گھس آیا۔ اسی گاؤں میں واقع ایک نجی رہائشی اسکول 'لوکیش انگلش اسکول' کا ہاسٹل بھی پانی کی زد میں آ گیا، جہاں 162 بچے موجود تھے۔

بارش کے دوران اچانک پانی کی سطح بڑھنے لگی تو اسکول کے ہاسٹل میں سوئے ہوئے بچوں کو سنبھلنے کا بھی موقع نہ ملا۔ جیسے ہی پانی ہاسٹل کے اندر داخل ہونے لگا، بچوں کو فوراً چھت پر لے جایا گیا، جہاں انہوں نے پوری رات خوف اور بے بسی کے عالم میں گزاری۔

واقعے کی اطلاع ملتے ہی مقامی دیہاتی موقع پر پہنچے اور فوری طور پر پولیس و انتظامیہ کو خبر دی۔ اتوار کی صبح ریسکیو آپریشن شروع کیا گیا۔ اس مہم میں پٹکا کے بی ڈی او ارون کمار منڈا، سی او نکیتا بالا، کووالی تھانہ انچارج دھننجے پاسوان اور دیگر افسران شامل رہے۔ ٹیم نے بڑی احتیاط اور تدبر سے بچوں کو کشتیوں اور رسّیوں کے ذریعے بحفاظت نکالا۔

ریسکیو ٹیم مسلسل بچوں سے رابطے میں رہی اور انہیں تسلی دیتی رہی تاکہ وہ خوفزدہ نہ ہوں۔ تمام بچوں کو نکالنے کے بعد قریبی اسپتال میں ان کی صحت کی جانچ کی گئی۔ خوش قسمتی سے کوئی بچہ شدید طور پر متاثر نہیں ہوا، تاہم کئی بچے سردی اور خوف کے باعث تھکے اور نڈھال تھے۔

اس اسکول میں زیر تعلیم زیادہ تر بچے پٹکا اور آس پاس کے علاقوں سے تعلق رکھتے ہیں۔ انتظامیہ نے بچوں کے والدین کو فوراً اطلاع دی، جن میں سے کئی والدین اپنے بچوں کو لینے اسکول پہنچ گئے۔

محکمہ موسمیات کے مطابق یکم جون سے 29 جون کے درمیان مشرقی سنگھ بھوم ضلع میں 537.9 ملی میٹر بارش ریکارڈ کی گئی ہے، جو معمول سے 137 فیصد زیادہ ہے۔ اگلے چار دنوں میں بھی یہاں معمول سے 76 سے 100 فیصد زیادہ بارش کا امکان ظاہر کیا گیا ہے۔

انتظامیہ نے مقامی اسکولوں اور ہاسٹلز کو خبردار کیا ہے کہ وہ بارش کے دوران حفاظتی اقدامات کو ترجیح دیں اور ندیوں کے نزدیک رہنے والے افراد احتیاطی تدابیر اختیار کریں۔