وکلاء کی ہڑتال روکنے کے لئے اصول و ضوابط وضع کرنے کی تجویز ہے: بی سی آئی

نئی دہلی: بار کونسل آف انڈیا (بی سی آئی) وکلاء کی ہڑتال اور عدالتوں کے بائیکاٹ کو روکنے کے لئے اصول و ضوابط وضع کرنے کی تجویز کر رہی ہے۔ بی سی آئی کے چیئرمین سینئر ایڈوکیٹ منن کمار مشرا نے یہ اطلاع جسٹس ڈی وائی چندرچوڑ اور جسٹس ایم آر شاہ کی ڈویژن بنچ کو دی۔

منن کمار مشرا نے بتایا کہ اس سلسلے میں تمام بار کونسلوں کے ساتھ ایک میٹنگ کا اہتمام کیا گیا ہے۔ ڈویژن بنچ وکلا کی ہڑتال اور عدالتوں کے بائیکاٹ سے متعلق ازخود نوٹس لئے گئے معاملے کی سماعت کر رہی تھی۔

مشرا نے کہا کہ بی سی آئی کی ایک میٹنگ تمام بار کونسلوں کے ساتھ منعقد ہوئی ہے۔ ہم ایسے وکلاء کے خلاف کارروائی کے لئے اصول و ضوابط بنا رہے ہیں جو کسی مناسب سبب کے بغیر ہڑتال کرتے ہیں اور عدالتوں کا بائیکاٹ کرتے ہیں۔ بی سی آئی کے اس موقف کے بعد ڈویژن بنچ نے یہ کہتے ہوئے سماعت ملتوی کر دی کہ بی سی آئی خود معاملے کو نمٹا رہی ہے۔