’مہنگائی مَین کی وصولی تھم نہیں رہی‘، پٹرول-ڈیزل کی قیمتوں میں تازہ اضافہ کے بعد کانگریس کا پی ایم مودی پر حملہ

پٹرول اور ڈیزل کی قیمتوں میں آج ہوئے زبردست اضافہ نے عوام کو شدید دھچکا دیا ہے۔ اس اضافہ کے بعد دیگر ضروری اشیا کی قیمتوں میں اضافہ بھی لازم ہے۔ تازہ اضافہ کے بعد اپوزیشن پارٹی کانگریس نے پی ایم مودی کو پھر سے نشانے پر لیا ہے۔ سوشل میڈیا پلیٹ فارم ’ایکس‘ پر پارٹی نے لکھا ہے کہ ’’مہنگائی مَین مودی نے پٹرول-ڈیزل 11 دن میں 8 روپے مہنگا کر دیا۔ آج پھر پٹرول پر 2.87 روپے اور ڈیزل پر 2.80 روپے بڑھا دیے گئے ہیں۔‘‘

کانگریس نے گزشتہ 10 دنوں میں پٹرول اور ڈیزل کی بڑھی ہوئی قیمتوں کی تفصیل بھی سوشل میڈیا پوسٹ میں پیش کی ہے۔ اس نے بتایا ہے کہ 15 مئی کو پٹرول 3.29 روپے، 19 مئی کو 96 پیسے، 23 مئی کو 94 پیسے اور 25 مئی کو 2.87 روپے فی لیٹر بڑھ گئے۔ اسی طرح 15 مئی کو ڈیزل کی قیمت میں 3.11 روپے، 19 مئی کو 94 پیسے، 23 مئی کو 95 پیسے اور 25 مئی کو 2.80 روپے فی لیٹر اضافہ کر دیا گیا۔

اس تفصیل کو پیش کرنے کے بعد کانگریس نے کہا کہ مجموعی طور پر 10 دنوں میں پٹرول کی قیمت میں 8.06 روپے فی لیٹر اور ڈیزل کی قیمت میں 7.80 روپے فی لیٹر کا اضافہ ہو گیا ہے۔ پارٹی نے الزام عائد کیا کہ اپنے سرمایہ دار دوستوں کو مالا مال کرنے کے لیے پی ایم مودی عوام کی جیب کاٹنے میں مصروف ہیں۔ ساتھ ہی یہ بھی کہا کہ ’’لوگ مہنگائی میں پِس رہے ہیں، پریشان ہیں، لیکن ’مہنگائی مَین‘ کی وصولی تھمنے کا نام نہیں لے رہی۔‘‘

دوسری طرف عآپ رکن پارلیمنٹ سنجے سنگھ نے بھی پٹرول اور ڈیزل کی قیمتوں میں آج ہوئے بے تحاشہ اضافہ کے خلاف آواز اٹھائی ہے۔ انھوں نے طنزیہ انداز میں ’ایکس‘ پر لکھا ہے کہ ’’ملک کے پیارے باشندو، مودی جی کے لیے آپ محض ایک ووٹ ہیں۔ انتخاب ختم، ضرورت ختم۔ ویسے اندھ بھکت تو 200 روپے تک پٹرول خریدنے کو تیار ہیں۔‘‘ اسی طرح دہلی کے سابق نائب وزیر اعلیٰ اور عآپ لیڈر منیش سسودیا نے بھی پی ایم مودی کو تنقید کا نشانہ بناتے ہوئے کہا ہے کہ ’’رحم کیجیے مودی جی، آپ روزانہ پٹرول و ڈیزل کی قیمت بڑھا دے رہے ہیں، تنخواہ کسی کی بڑھ نہیں رہی۔ ملازمت بچی رہے یہی غنیمت ہے۔‘‘