کورونا کی رفتار میں اضافہ، دہلی میں 5 ماہ بعد 100 سے زائد کیسز کی تصدیق، ایم سی ڈی کی وینٹی لیٹر-ادویات سے متعلق ہدایات جاری

نئی دہلی: ملک میں کورونا وائرس پھر رفتار پکڑ رہا ہے۔ گزشتہ 24 گھنٹوں میں 1249 کیسز رپورٹ ہوئے ہیں۔ فعال کیسز کی تعداد بڑھ کر 7927 ہو گئی ہے۔ صرف دہلی میں ہی جمعرات کے روز 117 معاملے سامنے آئے ہیں۔ خیال رہے کہ راجدھانی دہلی میں تقریباً 5 ماہ بعد 100 سے زائد کیسز کی تصدیق کی گئی ہے۔ اس سے قبل 29 اکتوبر 2022 کو 100 کیسز رپورٹ ہوئے تھے۔

دہلی میں فعال کیسز بڑھ کر 346 ہو گئے ہیں۔ ان میں سے 17 اسپتال میں ہیں جبکہ باقی مریض گھروں میں آئسولیشن میں ہیں۔ جمعرات کو راجدھانی میں 2362 ٹیسٹ کیے گئے اور 4.95 فیصد مثبت شرح کے ساستھ 117 مریض مثبت پائے گئے۔ دہلی میں 10 مارچ سے معاملات میں مسلسل اضافہ ہو رہا ہے۔ اب تک 20 لاکھ سے زیادہ کیسز کی تصدیق کی جا چکی ہے اور 26524 لوگوں کی موت ہو چکی ہے۔

دہلی میونسپل کارپوریشن نے انفلوئنزا اور کورونا کے معاملات میں اضافے کے پیش نظراسپتالوں کو مشورہ دیا ہے کہ وہ بخار کے مریضوں کی اسکریننگ کو یقینی بنائیں اور ضروری ادویات کا مناسب ذخیرہ رکھیں۔ ایم سی ڈی کی جانب سے اسپتالوں سے کہا گیا ہے کہ وہ اس بات کو یقینی بنائیں کہ وینٹی لیٹر اور دیگر آلات ٹھیک سے کام کریں۔

میونسپل کارپوریشن کی جانب سے کہا گیا ہے کہ اسپتال ملازمین اور مریضوں کو ویکسین کی بوسٹر ڈوز کی تشہیر کرے۔ اس کے علاوہ کورونا سے بچاؤ کے لیے حکومت کی ہدایات پر عمل درآمد کے لیے مناسب احتیاطی تدابیر اختیار کریں۔ ایم سی ڈی نے اپنے اسپتالوں سے کہا ہے کہ وہ صفائی کو یقینی بنانے، انفیکشن کے پھیلاؤ کو روکنے اور بائیو میڈیکل ویسٹ کے مناسب انتظام کو یقینی بنانے کے لیے ایک نوڈل افسر مقرر کریں۔

ایم سی ڈی نے اسپتالوں سے کہا ہے کہ وہ عملے اور مریضوں کے چہرے کے ماسک پہننے، سماجی دوری، صابن سے ہاتھ دھونے اور احاطے کی مناسب صفائی کو یقینی بنائیں۔

ہندوستان میں فعال کیسز بڑھ کر 7927 ہو گئے ہیں۔ گزشتہ 24 گھنٹوں میں 1249 کیسز رپورٹ ہوئے۔ جبکہ 925 افراد صحت یاب ہو چکے ہیں۔ یومیہ مثبتیت کی شرح 1.19 فیصد تک بڑھ گئی ہے۔ صحت یابی کی شرح 98.79 فیصد ہے۔ مہاراشٹر میں ملک میں سب سے زیادہ کیسز پائے گئے ہیں، جمعرات کو یہاں 198 کیسز کی تصدیق کی گئی۔ جبکہ 229 افراد صحت یاب ہو چکے ہیں۔ تاہم کورونا سے کسی کی موت نہیں ہوئی۔

مہاراشٹر میں اب تک 81 لاکھ کیس رپورٹ ہوئے ہیں۔ مرنے والوں کی تعداد 148430 تک پہنچ گئی ہے۔ ریاست میں 1617 ایکٹو کیسز ہیں۔ اس سے قبل بدھ کو ریاست میں 334 کیسز پائے گئے تھے، جب کہ ایک کی موت ہوئی تھی۔