میئروں کو اختیارات ملیں تو 46 بڑے شہروں کی بدل جائے گی تصویر، نیتی آیوگ کی اہم سفارشات

 نیتی آیوگ نے حکومت سے سفارش کی ہے کہ تمام ریاستوں میں لازمی طور سے میئر کا انتخاب 5 سال کی مدت کے لیے عوام کے درمیان سے کرایا جائے۔ اس کے ساتھ ہی میئر-ان-کاونسل سسٹم بنا کر اسے پورے شہر میں ہر طرح کی ترقی کرنے کے لیے تمام اختیارات دیئے جائیں۔ شہری منصوبہ بندی، سڑکیں اور پل جیسے کام نگر نگم کو دیئے جانے چاہئیں۔ اس کے علاوہ ریاستی قانون ساز اسمبلی کی نگرانی کے بغیر شہری حکومت کو تحلیل کرنے پر روک لگانی چاہئے۔ کمشنر کو میئر کے تحت کردیا جانا چاہئے۔

نیتی آیوگ کی سفارشات کے مطابق میئروں کو اختیارات ملیں تو 10 لاکھ سے زیادہ کی آبادی والے ملک کے 46 بڑے شہروں کی صورت بدل جائے گی۔ اس سے پانی سپلائی، صفائی، کچرا نپٹارہ، شہری منصوبہ بندی، فوری خدمات اور بس کے آپریشن جیسی خدمات بہتر طریقے سے عوام کے درمیان پہنچ پائیں گی۔

رپورٹ میں کہا گیا ہے کہ کاموں کی سب سے زیادہ مرکزیت مہاراشٹر اور گجرات میں ہے۔ یہاں شہر کی حکومتیں پانی سپلائی، صفائی، ٹھوس کچرا نپٹارہ اور بس خدمات کو کنٹرول کرتی ہیں۔ دہلی، کرناٹک، تمل ناڈو، آندھرا پردیش، تلنگانہ، کیرالہ، اترپردیش اورمدھیہ پردیش کے کئی شہروں میں بس خدمات اور شہری منصوبہ بندی اب بھی نگر نگم کے بجائے ریاست کے کنٹرول میں ہیں۔ مضبوط اور جوابدہ شہری سطحی انتظامیہ کے لیے مضبوط میئر-ان-کاونسل نظام نافذ کرنا ضروری ہے۔

 نیتی آیوگ نے اپنی رپورٹ میں کہا ہے کہ ریاستی حکومتیں نگر پالیکا کے قوانین میں ترمیم کرکے میئر-ان-کاونسل کو نگر نگم کا اعلیٰ کارگزار بلدیہ اعلان کریں اور اس کے کردار واضح کریں۔ اس بندوبست میں شہری منصوبہ بندی، خدمات کی فراہمی، مالیاتی اور انسانی وسائل جیسے اہم علاقوں میں ایکزیکیوٹیو اختیارات میئر اور منتخب کونسلروں کے ذریعہ اجتماعی طور سے استعمال کئے جائیں گے۔

میئر-ان-کاونسل کے اندر پورٹ فولیو پر مبنی سسٹم نافذ کیا جائے جس میں ہر رکن کو ایک خاص محکمہ کی ذمہ داری دی جائے۔ میئر کو ہی اختیار ہونا چاہئے کہ وہ محکموں کے سربراہوں کی تقرری کرے۔ اصل میں ملک میں 10 لاکھ سے زیادہ کی آبادی والے 46 نگر نگم والے ان شہروں کا دائرہ 10926 مربع کلو میٹر تک پھیلا ہے۔ شہری آبادی کے 36 فیصد لوگ انہیں شہروں میں رہتے ہیں۔