’میں اپنے گھر لوٹ رہا ہوں‘، مغربی بنگال کے مشہور لیڈر قاضی عبدالرحیم نے کانگریس میں شمولیت اختیار کی

مغربی بنگال میں اسمبلی انتخاب کی سرگرمیوں کے درمیان مشہور لیڈر قاضی عبدالرحیم نے کانگریس میں شمولیت اختیار کر لی ہے۔ آج کانگریس جنرل سکریٹری و مغربی بنگال کے انچارج غلام احمد میر اور ریاستی صدر سبھانکر سرکار کی موجودگی میں ایک پریس کانفرنس کے دوران قاضی عبدالرحیم کانگریس میں شامل ہوئے۔ اس موقع پر قاضی عبدالرحیم نے کہا کہ ’’مغربی بنگال کی سیاست میں میرے والد 50 سالوں تک فعال رہے۔ وہ کانگریس کے رکن تھے۔ کانگریس میں شامل ہو کر میں اپنے گھر لوٹ رہا ہوں، مجھے اس بات کی بہت خوشی ہے۔‘‘

قاضی عبدالرحیم کا پارٹی میں استقبال کرنے کے بعد غلام احمد میر نے میڈیا سے مخاطب ہوتے ہوئے کہا کہ ’’قاضی عبدالرحیم مغربی بنگال کی سیاست میں ایک جانا پہچانا نام ہیں۔ یہ اپنے کام اور عوامی خدمت کے لیے مشہور ہیں اور مغربی بنگال کے آئندہ اسمبلی انتخاب کے پیش نظر کانگریس میں شامل ہو کر اپنے خطہ کے لیے کام کرنا چاہتے ہیں۔‘‘ انھوں نے امید ظاہر کی کہ ان کی شمولیت سے پارٹی کو مضبوطی ملے گی اور ریاستی عوام کو بھی اس سے فائدہ پہنچے گا۔

پریس کانفرنس سے خطاب کرتے ہوئے ریاستی صدر سبھانکر سرکار نے کہا کہ ’’آج قاضی عبدالرحیم کانگریس فیملی سے جڑے ہیں، مزید کئی لیڈران ہمارے ساتھ جڑنے والے ہیں۔ بدوریا کی عوام کی دعاؤں سے قاضی عبدالرحیم جی کانگریس پارٹی کے مضبوط سپاہی کی شکل میں کام کریں گے۔‘‘ وہ مزید کہتے ہیں کہ ’’کناگریس پارٹی مغربی بنگال میں ترقی کی سیاست کرنا چاہتی ہے اور ہمارا ہدف ٹی ایم سی کو اقتدار سے ہٹانا اور بی جے پی کو روکنا ہے۔‘‘ انھوں نے ریاست میں مضبوطی کے ساتھ انتخابی جنگ لڑنے کا عزم بھی ظاہر کیا۔