موسلادھار بارش، آندھی، بجلی... دہلی سے بنگال تک محکمہ موسمیات کا ’راحت‘ والا الرٹ

جنوب مغربی مانسون کے شمال مشرقی علاقوں کی طرف مزید پیش قدمی کرنے کے سبب اب آئندہ 5-4 دنوں میں مہاراشٹر، تلنگانہ، آندھرا پردیش، اڈیشہ، جھارکھنڈ، بہار اور بنگال کے دیگر حصوں میں تیز بارش کا امکان ہے۔ ہندوستانی محکمۂ موسمیات (آئی ایم ڈی) کی تازہ ترین اپڈیٹ کے مطابق ملک کی کئی ریاستوں میں بدھ (10 جون) کو بارش، گرج چمک اور تیز ہواؤں کا سلسلہ دیکھنے کو مل سکتا ہے۔ گویا کہ محکمہ موسمیات کے ذریعہ گرمی سے پریشان عوام کے لیے ’راحت‘ والا الرٹ جاری کر دیا گیا ہے۔

محکمہ موسمیات کے مطابق بہار، جھارکھنڈ، اڈیشہ، بنگال اور سکم میں بارش کا امکان ہے۔ بہار کے بعض حصوں میں شدید بارش کی وارننگ جاری کی گئی ہے، جبکہ سکم اور ذیلی ہمالیائی مغربی بنگال میں انتہائی شدید بارش ہو سکتی ہے۔ آسام، میگھالیہ، اروناچل پردیش، ناگالینڈ، منی پور، میزورم اور تریپورہ میں بھی شدید بارش کی پیش گوئی کی گئی ہے۔

دہلی والوں کو کچھ راحت

قابل ذکر ہے کہ شدید گرمی سے بے حال دہلی-این سی آر کے لوگوں کو گزشتہ رات کچھ راحت ملی۔ راجدھانی اور اس کے آس پاس کے علاقوں میں تیز آندھی کے ساتھ بارش ہوئی، جس سے درجۂ حرارت میں معمولی کمی آئی اور لوگوں نے گرمی سے کچھ راحت محسوس کی۔ بارش کے ساتھ تیز ہواؤں کے دوران آسمان میں بجلی بھی چمکتی دیکھی گئی۔ آج بدھ کے روز بھی اسی طرح کے موسم کی پیش گوئی جاری کی گئی ہے۔

ہریانہ، پنجاب کا موسم

شمالی ہندوستان میں بدھ کے روز موسم 2 مختلف شکلوں میں نظر آئے گا۔ ہریانہ، پنجاب، مغربی اتر پردیش اور راجستھان کے کئی حصوں میں اب بھی لو جیسی صورتحال برقرار رہ سکتی ہے۔ پہاڑی ریاستوں ہماچل پردیش، اتراکھنڈ اور جموں و کشمیر میں ہلکی سے درمیانی بارش کے آثار ہیں۔ 11 جون سے ایک نئے مغربی اضطراب کے باعث ان علاقوں میں موسم کے مزید سرگرم ہونے کا امکان ہے۔

ان سب کے علاوہ جنوبی ہندوستان میں موسم سب سے زیادہ سرگرم رہنے کا امکان ہے۔ کیرالہ، ساحلی کرناٹک، تمل ناڈو، پڈوچیری، تلنگانہ اور لکشدیپ میں شدید بارش کی پیش گوئی کی گئی ہے۔ اس کے علاوہ تمل ناڈو اور تلنگانہ میں بھی کئی مقامات پر شدید بارش کی وارننگ جاری کی گئی ہے۔

مدھیہ پردیش سے گوا تک بارش

آئی ایم ڈی کے مطابق مدھیہ پردیش، چھتیس گڑھ اور ودربھ میں بھی کہیں کہیں بارش اور تیز ہواؤں کا امکان ہے۔ مہاراشٹر کے کونکن اور گوا خطے میں شدید بارش کا سلسلہ جاری رہ سکتا ہے، جبکہ گجرات، مراٹھواڑہ اور وسطی مہاراشٹر میں بھی کئی مقامات پر بارش کے آثار ہیں۔ آئی ایم ڈی نے ماہی گیروں کو بحیرۂ عرب اور خلیج بنگال کے کئی حصوں میں سمندر میں نہ جانے کا مشورہ دیا ہے۔ محکمۂ موسمیات نے لوگوں سے آندھی، بجلی اور تیز ہواؤں کے دوران محتاط رہنے کی اپیل کی ہے۔