تیجس کے حادثہ کا شکار ہونے پر ’ایچ اے ایل‘ کا آفیشیل بیان آیا سامنے، میڈیا رپورٹس کو بتایا گمراہ کن

ہندوستان کے سودیشی جنگی طیارے ایل سی اے تیجس کے حادثے سے متعلق خبروں پر آج ہندوستان ایروناٹکس لمیٹڈ (ایچ اے ایل) نے آفیشیل بیان جاری کیا ہے۔ ایچ اے ایل نے طیارے کے حادثہ کا شکار ہونے سے متعلق میڈیا رپورٹس پر کہا ہے کہ ’’کچھ رپورٹس نے حقائق کے حوالے سے ابہام پیدا کیا ہے۔‘‘ کمپنی نے واضح کیا ہے کہ ایل سی اے تیجس طیارے کے کسی بھی قسم کے حادثے کا شکار ہونے کا کوئی واقعہ پیش نہیں آیا۔ واضح رہے کہ ایل سی اے تیجس طیارہ ایچ اے ایل کا تیار کردہ ہے، جبکہ کچھ میڈیا رپورٹس میں اس کے گر کر تباہ ہونے کا دعویٰ کیا گیا تھا۔

پیر (23 فروری) کو جاری بیان میں ایچ اے ایل نے کہا کہ جس واقعے کا ذکر کیا جا رہا ہے وہ پرواز کے دوران نہیں، بلکہ زمین پر پیش آنے والا ایک معمولی تکنیکی واقعہ تھا۔ اسے باقاعدہ دیکھ بھال اور معیاری آپریٹنگ طریقہ کار کے تحت فوری طور پر سنبھال لیا گیا۔ اس واقعے سے کسی قسم کے بڑے نقصان یا جانی نقصان کی کوئی اطلاع نہیں ہے۔

کمپنی کا کہنا ہے کہ ایل سی اے تیجس دنیا کے ہم عصر لڑاکا طیاروں میں بہترین حفاظتی ریکارڈ رکھنے والے طیاروں میں شامل ہے۔ یہ سودیشی لڑاکا طیارہ جدید ترین ٹیکنالوجی، جدید ایویونکس اور سخت حفاظتی معیارات کے لیے جانا جاتا ہے۔ ایچ اے ایل نے یہ بھی بتایا کہ معیاری طریقہ کار کے تحت تکنیکی پہلوؤں کا گہرا تجزیہ کیا جا رہا ہے۔ کمپنی اس معاملے میں ہندوستانی فضائیہ کے ساتھ مل کر کام کر رہی ہے، تاکہ کسی بھی ممکنہ تکنیکی مسئلے کا فوری اور مؤثر حل یقینی بنایا جا سکے۔

کمپنی نے اپیل کی ہے کہ باضابطہ تصدیق کے بغیر کسی بھی قسم کی قیاس آرائیاں نہ کی جائیں اور صرف مستند معلومات ہی عام کی جائیں۔ ایچ اے ایل نے دہرایا کہ تیجس پروگرام مکمل طور پر محفوظ، قابل اعتماد اور ملک کی دفاعی صلاحیت کو مضبوط بنانے والا ہے۔ اس وضاحت کے ساتھ ایچ اے ایل نے یہ واضح کرنے کی کوشش کی ہے کہ ایل سی اے تیجس پوری طرح محفوظ ہے اور اس کی کارکردگی میں کوئی رکاوٹ نہیں ہے۔

اس سے قبل قومی راجدھانی نئی دہلی سے سامنے آنے والی معلومات کے مطابق ہندوستانی فضائیہ کا ایک تیجس ہلکا لڑاکا طیارہ 7 فروری کو ایک فرنٹ لائن ایئربیس پر لینڈنگ کے دوران رن وے سے آگے نکل گیا۔ ابتدائی طور پر بریک فیل ہونے کا خدشہ ظاہر کیا گیا ہے۔ رپورٹس میں ذرائع کے حوالے سے بتایا گیا کہ طیارے کے ایئرفریم کو شدید نقصان پہنچا، تاہم پائلٹ نے وقت رہتے ایجیکٹ کر کے اپنی جان بچا لی۔ بتایا جا رہا ہے کہ طیارہ تربیتی پرواز مکمل کر کے بیس پر واپس لوٹ رہا تھا۔ اس واقعے پر اب تک فضائیہ کی جانب سے باضابطہ بیان جاری نہیں کیا گیا ہے۔

واقعے کے بعد احتیاطی طور پر فضائیہ نے تقریباً 30 سنگل سیٹ تیجس طیاروں کو جامع تکنیکی جانچ کے لیے عارضی طور پر گراؤنڈ کر دیا ہے۔ ماہرین کی ٹیمیں بریکنگ سسٹم اور دیگر تکنیکی پہلوؤں کی تفصیلی چھان بین کر رہی ہیں۔ یہ تیجس طیارے سے وابستہ تیسرا واقعہ ہے۔ اس سے قبل مارچ 2024 میں جیسلمیر کے قریب ایک تیجس طیارہ گر کر تباہ ہوا تھا، جبکہ نومبر 2025 میں دبئی ایئر شو کے دوران بھی ایک تیجس طیارہ حادثے کا شکار ہوا تھا۔

یہ تازہ واقعہ ایک ایسے وقت میں پیش آیا ہے جب تیجس بنانے والی کمپنی ہندوستان ایروناٹکس لمیٹڈ (ایچ اے ایل) پہلے ہی تیجس ایم کے-1اے کی فراہمی میں تاخیر کے باعث دباؤ کا شکار ہے۔ فروری 2021 میں وزارت دفاع نے ایچ اے ایل کے ساتھ 83 تیجس ایم کے-1اے طیاروں کی خریداری کے لیے 48,000 کروڑ روپے کا معاہدہ کیا تھا۔ اس کے بعد ستمبر 2025 میں مزید 97 تیجس ایم کے-1اے طیاروں کی خریداری کے لیے 62,370 کروڑ روپے کا دوسرا معاہدہ ہوا۔ ڈیلیوری میں تاخیر کی بنیادی وجہ امریکی کمپنی کی جانب سے انجن کی فراہمی میں مقررہ وقت کی پابندی نہ کرنا بتائی جا رہی ہے۔