’گیانیش کمار نے الیکشن کمیشن کے ساتھ ساتھ ہندوستان کی ساکھ پر بٹّہ لگایا ہے‘، یوگیندر یادو اور عام ووٹرس کا اظہارِ تشویش

انڈیا بلاک کے ذریعہ 31 اکتوبر کو منعقدہ ’علامتی پارلیمنٹ‘ میں صرف سیاسی لیڈران ہی موجود نہیں رہے، بلکہ سماجی لیڈران و کارکنان کے ساتھ ساتھ کچھ عام ووٹرس نے بھی شرکت کی اور ایس آئی آر کی خامیوں کو سبھی کے سامنے پیش کیا۔ ’سوراج انڈیا‘ کے سربراہ یوگیندر یادو نے تو چیف الیکشن کمشنر گیانیش کمار کو ایک طرح سے کٹہرے میں ہی کھڑا کر دیا۔ انھوں نے کہا کہ ’’گیانیش کمار نے الیکشن کمیشن کے ساتھ ساتھ ہندوستان کی ساکھ پر بھی بٹّہ لگایا ہے۔ انھوں نے اس ملک کو توڑنے کی سازش کی ہے۔‘‘