ہندوستان کے سونے کے ذخائر پہلی بار 100 ارب ڈالر کے قریب پہنچ گئے

موجودہ جغرافیائی سیاسی صورتحال کے پیش نظر دنیا کے دیگر مرکزی بینکوں کی طرح ریزرو بینک آف انڈیا (آر بی آئی) بھی سونے کے ذخائر میں مسلسل اضافہ کر رہا ہے اور اب یہ پہلی بار 100 ارب ڈالر تک پہنچنے کے قریب ہے۔مرکزی بینک کے اعداد و شمار کے مطابق، 26 ستمبر کو ختم ہونے والے ہفتے میں سونے کے ذخائر 2.238 ارب ڈالر بڑھ کر 95.017 ارب ڈالر ہو گئے، جو اس کی اب تک کی بلند ترین سطح ہے۔

زرمبادلہ کے ذخائر میں مسلسل دوسرے ہفتے کمی ہوئی تاہم سونے کے ذخائر میں مسلسل پانچویں ہفتے اضافہ ہوا۔ اس سے ظاہر ہوتا ہے کہ مرکزی بینک اب غیر ملکی کرنسی کے مقابلے سونے پر زیادہ انحصار کر رہا ہے اور اپنے سونے کے ذخائر کو بڑھانے کی مسلسل کوشش کر رہا ہے۔ بین الاقوامی سطح پر سونے کی قیمتوں میں مسلسل اضافے نے بھی اس میں اہم کردار ادا کیا ہے۔

قابل ذکر ہے کہ ملک کے زرمبادلہ کے ذخائر 26 ستمبر کو ختم ہونے والے ہفتے میں 2.334 ارب ڈالر کم ہو کر 700.236 ارب ڈالر ہو گئے۔ اس میں زرمبادلہ کے ذخائر کا سب سے بڑا جزو غیر ملکی کرنسی کے اثاثے 4.393 ارب ڈالر کم ہو کر 581.757 ارب ڈالر پر آگیا۔

غیر ملکی زرمبادلہ کے ذخائر کے معاملے میں ہندوستان اب روس سے پیچھے ہوکر دنیا میں پانچویں نمبر پر آگیا ہے۔ چین، جاپان اور سوئٹزرلینڈ بالترتیب پہلی تین پوزیشنوں پر فائز ہیں۔ تاہم، اگر سونے کے ذخائر کو چھوڑ دیا جائے تو، ہندوستان اب بھی چوتھے نمبر پر قائم ہے۔