پھر بڑھ سکتی ہے پٹرول کی قیمت، سعودی حکومت کا فیصلہ ہوگا اثر انداز

سعودی عرب دنیا کے ان بڑے ممالک میں سے ایک ہے جو سب سے زیادہ کچا تیل پیدا کرتا ہے اور اب اس ملک نے اپنی تیل کی پیدوار گھٹانے کا فیصلہ کیا ہے ۔ سعودی عرب کے اس فیصلہ کے فوراً بعد عالمی سطح پر کچے تیل کی قیمتوں میں دو فیصدی سے زیادہ کا اضافہ ہو گیا ہے۔ماہرین کا کہنا ہے کہ اگر دوسرے ممالک بھی اپنے کچے تیل کی پیداوار گھٹاتے ہیں تو تیل کی قیمتوں میں اضافہ ہو سکتا ہے ۔ اگر ایسا ہوا تو ہندوستان کو جہاں ایران سے تیل لینے کے بعد سے تیل کی قیمتوں میں راحت ملی تھی وہ ختم ہو جائے گی اور تیل کی قیمتوں میں پھر سے اضافہ شروع ہو جائے گا۔

واضح رہے کہ اکتوبر ماہ میں سپلائی بڑھنے اور ڈیمانڈ گھٹنے کے چلتے کچے تیل کی قیمتیں بیس فیصد تک کم ہو گئی تھیں ۔ فی الحال بریٹ کروڈ کی قیمتیں 71 ڈالر فی بیرل کے اوپر پہنچ گئی ہے ۔ 3 اکتوبر کو کچا تیل اس سال کے سب سے اوپری سطح 86.74 ڈالر فی بیرل ہو گیا تھا۔ کچے تیل میں گراوٹ کی مرکزی وجہ روس، سعودی عرب اور امریکہ کی جانب سے کچے تیل کی پیداوار میں اضافہ تھا۔

سعودوی عرب کے وزیر برائے تیل خالد الفلاح نے صحافیوں کو بتایا کہ سعودی عرب کی تیل کمپنی نومبر ماہ کے مقابلہ دسمبر میں کچے تیل کی پیداوار پانچ لاکھ فی بیرل تک گھٹا سکتی ہے۔ اس فیصلہ سے تیل کی عالمی سپلائی میں 0.50 فیصدی تک کم آ جائے گی ۔

ماہرین کا ماننا ہے کہ کچا تیل ایکسپورٹ کرنے والے ممالک اگر سعودی عرب کی طرح فیصلہ لیتے ہیں تو کچے تیل کی قیمتیں بہت تیزی سے بڑھیں گی۔ واضح رہے ابھی تک صرف سعودی عرب نے تیل کی پیداوار میں کمی کرنے کا اعلان کیا ہے۔