سابق وزیر اعلیٰ محبوبہ مفتی ایک بار پھر پی ڈی پی کی صدر منتخب

سری نگر: سابق وزیر اعلیٰ محبوبہ مفتی پیر کے روز ایک بار پھر اتفاق رائے سے تین برس کے لئے پی ڈی پی کی صدر منتخب ہوگئیں۔ بتادیں کہ محبوبہ مفتی سال 2016 سے پارٹی کی زمام صدارت تھامے ہوئے ہیں۔ وہ سال 2016 میں اپنے والد اور اس وقت کے پارٹی صدر مفتی محمد سعید کے انتقال کے بعد پارٹی صدر مقرر ہوئی تھیں۔

پارٹی ذرائع نے بتایا کہ محبوبہ مفتی کو پیر کے روز اتفاق رائے سے ایک بار پھر تین برسوں کے لئے پارٹی صدر منتخب کیا گیا۔ انہوں نے بتایا کہ محبوبہ مفتی کا نام پارٹی کے سینئر لیڈروں بشمول غلام نبی ہانجورہ اور خورشید عالم نے تجویز کیا تھا۔ ان کا کہنا تھا کہ پارٹی کے الیکٹرول کالج کے ممبران نے کشمیر میں جموں صوبے میں ووٹ ڈال کر پارٹی صدر کو منتخب کیا ہے۔

بتادیں کہ محبوبہ مفتی کی تین سالہ صدارت کا وقت سال گزشتہ ماہ اکتوبر 2020 میں ہی ختم ہو چکا تھا لیکن کورونا وبا کے باعث صدر منتخب کرنے کے لئے انتخابات منعقد نہیں کیے جا سکے۔ دریں اثنا پی ڈی پی نے اپنے آفیشل ٹوئٹر ہینڈل پر ایک ٹوئٹ میں کہا کہ محبوبہ مفتی کو بہ اتفاق رائے تین برسوں کے لئے پارٹی صدر منتخب کیا گیا ہے۔ ان کے نام کو پارٹی کے سینئر لیڈروں جناب غلام نبی ہانجورہ اور جناب خورشید عالم نے تجویز کیا تھا۔ سینئر لیڈر جناب عبدالرحمان ویری الیکشن بورڈ کے چیئرمین تھے‘۔