نوئیڈا انٹرنیشنل ایئرپورٹ سے پہلی فلائٹ کا شیڈول جاری، کل سے شروع ہوں گی پروازیں

نوئیڈا انٹرنیشنل ایئرپورٹ (جیور) سے 15 جون سے کمرشیل پروازوں کا باقاعدہ آغاز ہو جائے گا۔ افسران نے بتایا کہ نئے ایئرپورٹ سے سب سے پہلے ڈومیسٹک ایئرلائن کمپنی ’انڈیگو‘ اپنی خدمات شروع کرے گی۔ انڈیگو کی پہلی پرواز 15 جون کو صبح 7:05 بجے لکھنؤ کے چودھری چرن سنگھ انٹرنیشنل ایئرپورٹ سے روانہ ہوگی اور صبح 8:05 بجے نوئیڈا انٹرنیشنل ایئرپورٹ پہنچے گی۔ اس کے بعد اس ایئرپورٹ سے پہلی باقاعدہ کمرشیل پرواز بنگلورو کے لیے روانہ کی جائے گی۔

گوتم بدھ نگر ضلع میں یمنا ایکسپریس وے انڈسٹریل ڈیولپمنٹ اتھارٹی (وائی ای آئی ڈی اے) کے علاقے میں واقع یہ ایئرپورٹ اتر پردیش حکومت کے بڑے انفراسٹرکچر پروجیکٹس میں شامل ہے۔ افسران کا کہنا ہے کہ اس ایئرپورٹ کی تعمیر سے ملک کے بڑے ایوی ایشن، لاجسٹکس اور کنیکٹیوٹی ہب کے طور پر اتر پردیش کی پوزیشن مزید مضبوط ہوگی۔ ایئرپورٹ کے پہلے مرحلے کی تعمیر مکمل ہو چکی ہے، جس میں سالانہ 1.2 کروڑ (12 ملین) مسافروں کو سنبھالنے کی گنجائش ہے۔

واضح رہے کہ نوئیڈا انٹرنیشنل ایئرپورٹ کے پہلے مرحلے میں ایک رن وے، انٹیگریٹڈ ٹرمینل بلڈنگ اور ایئر ٹریفک کنٹرول (اے ٹی سی) ٹاور تعمیر کیا گیا ہے۔ اس ایئرپورٹ کو 6 مارچ 2026 کو ڈائریکٹوریٹ جنرل آف سول ایوی ایشن (ڈی جی سی اے) سے ایروڈوم لائسنس حاصل ہوا تھا۔ تقریباً 1334 ہیکٹر رقبے پر پھیلے اس پروجیکٹ کو 4 مرحلوں میں مکمل کیا جانا ہے۔ ہر مرحلے کی تکمیل پر نوئیڈا ایئرپورٹ پر مسافروں کی سالانہ گنجائش بالترتیب 2031 تک 3 کروڑ، 2036 تک 5 کروڑ اور 2040 تک 7 کروڑ تک پہنچ جائے گی۔

افسران نے بتایا کہ تمام چاروں مرحلوں کی تعمیر مکمل ہونے کے بعد نوئیڈا انٹرنیشنل ایئرپورٹ پر 5 رن وے ہوں گے اور اس پر مسافروں کی مجموعی سالانہ گنجائش 22.5 کروڑ (225 ملین) تک پہنچ جائے گی۔ اس سے یہ دنیا کے سب سے بڑے ایئرپورٹس میں شامل ہو جائے گا۔ یہ ایئرپورٹ مغربی اتر پردیش، دہلی-این سی آر، ہریانہ، راجستھان اور اتراکھنڈ کے مسافروں کو بہتر سفری سہولیات فراہم کرے گا۔

انڈیگو ایئرلائن مرحلہ وار طریقے سے اس ایئرپورٹ کو لکھنؤ، حیدرآباد، امرتسر، چنڈی گڑھ، جے پور، سری نگر اور پنت نگر سمیت 16 سے زائد شہروں سے جوڑنے کا منصوبہ بنا رہی ہے۔ نوئیڈا ایئرپورٹ کے پہلے مرحلے کا افتتاح رواں سال وزیر اعظم نریندر مودی نے کیا تھا۔ اتر پردیش حکومت کا اندازہ ہے کہ اس پروجیکٹ سے براہ راست اور بالواسطہ طور پر تقریباً ایک لاکھ روزگار کے مواقع پیدا ہوں گے۔ ساتھ ہی انڈسٹریل، لاجسٹکس، ویئر ہاؤسنگ، ہاسپیٹلٹی اور دیگر متعلقہ شعبوں میں بڑے پیمانے پر سرمایہ کاری آئے گی۔