کسان تحریک: خالصتانیوں کی شمولیت کے الزام پر سکھبیر بادل ناراض، کہا ’یہ کسانوں کی بے عزتی‘

زرعی قوانین کے خلاف کسانوں کی تحریک کو کمزور کرنے کے لیے مرکز کی مودی حکومت لاکھ کوششیں کر رہی ہے، لیکن اس میں کامیابی حاصل نہیں ہو رہی ہے۔ دن بہ دن کسانوں کا احتجاجی مظاہرہ مزید تیزی اختیار کرتا جا رہا ہے۔ اس درمیان کسان تحریک میں خالصتان حامیوں کی شرکت کی خبریں پھیلائی جا رہی ہیں جس پر شرومنی اکالی دل سربراہ سکھبیر بادل نے سخت اعتراض ظاہر کیا ہے اور کہا ہے کہ ’’کسان تحریک میں بزرگ خواتین شامل ہیں، کیا وہ خالصتانیوں کی طرح نظر آتی ہیں؟ یہ ملک کے کسانوں کو غدار کہنے کا ایک طریقہ ہے۔ یہ کسانوں کی بے عزتی ہے۔ وہ ہمارے کسانوں کو ملک مخالف کیسے کہہ سکتے ہیں؟‘‘

مرکز کی مودی حکومت اور بی جے پی کو تنقید کا نشانہ بناتے ہوئے سکھبیر بادل نے کہا کہ ’’کیا بی جے پی یا کسی دیگر کو کسی کو بھی ملک مخالف قرار دینے کا اختیار ہے؟ ان لوگوں (کسانوں) نے اپنی پوری زندگی ملک کے نام کر دی ہے اور اب آپ انھیں ملک مخالف کہہ رہے ہیں۔ جو لوگ انھیں غدار کہہ رہے ہیں وہ حقیقی معنوں میں خود غدار ہیں۔‘‘

اس درمیان سکھبیر بادل نے پنجاب کے سابق وزیر اعلیٰ پرکاش سنگھ بادل کے ذریعہ پدم وبھوشن ایوارڈ واپس کیے جانے کی تعریف کی اور کہا کہ ’’انھوں نے حکومت کو ایک مضبوط پیغام بھیجنے کے لیے اپنا ایوارڈ لوٹا دیا۔ کسانوں کو ان قوانین کی ضرورت نہیں ہے تو حکومت ہند انھیں مجبور کیوں کر رہی ہے؟‘‘