حکومت کے نئے ڈرافٹ سے کسان متفق، ’آفیشیل لیٹر‘ ملنے کے بعد تحریک پر ہوگا فیصلہ

زرعی قوانین کے خلاف تحریک کر رہے سنیوکت کسان مورچہ کی آج ہوئی میٹنگ ختم ہو گئی اور کسان لیڈروں نے واضح کر دیا ہے کہ ان کے مطالبات پر حکومت کے ذریعہ بھیجی گئی نئی تجویز پر وہ متفق ہیں۔ حالانکہ کسانوں نے کہا ہے کہ حکومت کی طرف سے اس مسودے کے بارے میں آفیشیل لیٹر ملنے کے بعد کسان تحریک کو ختم کرنے سے متعلق کوئی فیصلہ لیا جائے گا۔ اس کے لیے سنیوکت کسان مورچہ نے جمعرات کی دوپہر 12 بجے سنگھو بارڈر پر ایک بار پھر میٹنگ طلب کی ہے۔

سنیوکت کسان مورچہ کو حکومت کی طرف سے جو ترمیم شدہ ڈرافٹ ملا ہے ہے، اس میں حکومت نے کسان تحریک کے دوران الگ الگ ریاستوں میں ہوئی ایف آئی آر کو فوری اثر سے ختم کرنے کی بات منظور کر لی ہے۔ اس کے علاوہ اس میں کہا گیا ہے کہ ایم ایس پی پر بننے والی کمیٹی میں سنیوکت کسان مورچہ کے نمائندے بھی شامل ہوں گے اور الیکٹرسٹی بل کو بھی مورچہ کے نمائندوں سے بات کرنے کے بعد ہی پارلیمنٹ میں پیش کیا جائے گا۔

سنیوکت کسان مورچہ نے بتایا کہ حکومت ہند سے ایک ترمیم شدہ مسودہ پر مبنی تجویز کو قبول کرتے ہوئے مورچہ کے اندر ایک عام اتفاق قائم ہوا ہے۔ اب حکومت کے لیٹر ہیڈ پر دستخط کیے گئے آفیشیل لیٹر کا انتظار ہے۔ سنیوکت کسان مورچہ کے لیڈر گرنام سنگھ چڈھونی نے بتایا کہ آج حکومت کی طرف سے جو ڈرافٹ آیا ہے اس پر ہمارا اتفاق قائم ہوا ہے۔ حکومت کے اس ڈرافٹ کو ابھی آفیشیل لیٹر میں بدلنا باقی ہے۔ آفیشیل لیٹر آنے کے بعد کل میٹنگ ہوگی، اس میٹنگ میں تحریک کو ملتوی کرنے کو لے کر کوئی فیصلہ لیا جائے گا۔