اس سے بہتر تو اسکول ہوتا ہے! راجیہ سبھا میں نائب صدر جمہوریہ کا تبصرہ

نئی دہلی: راجیہ سبھا کے چیئرمین ایم وینکیا نائیڈو نے ایوان کے اراکین کے برتاؤ پر تبصرہ کرتے ہوئے بدھ کو کہا کہ اس سے بہتر تو اسکول ہوتا ہے۔

نائیڈو نے صبح ایوان کی کارروائی شروع کرتے ہوئے ضروری دستاویز میز پر رکھوائے اور اراکین سے خطاب کرتے ہوئے کہا کہ اراکین کو اپنا بیان دیتے ہوئے طے مدت کا دھیان رکھنا چاہیے۔ بیان دیتے وقت دیگر اراکین کو دھیرے بولنا چاہیے اور کارروائی میں رکاوٹ پیدا نہیں کرنی چاہیے۔ایوان میں نظام کو برقرار رکھنے کےلئے یہ ضروری ہے کہ سبھی اراکین ایوان کے ضابطوں پر عمل کریں۔

راجیہ سبھا چیئرمین نے کہا، ’’کسی رکن نے کہا ہے کہ یہ کوئی اسکول ہے؟ ارے بھائی، اسکول تو اس سے بہتر ہوتا ہے۔ وہاں کم از کم کارروائی تو کرسکتے ہیں‘‘۔ قابل ذکر ہے کہ چیئرمین ایوان کا کام کاج مناسب انداز میں چلانے کے لئے نظام برقرار رکھنے پر زور دیتے ہیں اور اراکین سے ایوان کے ضابطوں اور روایات پر عمل کرنے کی اپیل کرتے ہیں۔

اس کے بعد چیئرمین نے صدر جمہوریہ کے خطاب پر اظہار تشکر پر بحث کرانے کے لئے وقفہ صفر اور وقفہ سوال نہ کرانے کا اعلان کیا اور بولنے کے لئے اراکین کے نام پکارے۔ بہوجن سماج پارٹی کے ویر سنگھ کو بولنے کے لئے 10منٹ کا وقت مانگنے پر نائیڈو نے کہا، ’’میں کیا کروں؟ عوام نے آپ کو وقت دیا ہی نہیں۔‘‘ سنگھ کو اپنا بیان دینے کے لئے تین منٹ کا وقت دیا گیا تھا۔