
تصویر آئی اے این ایس
کوئمبٹور: تمل ناڈو میں برڈ فلو کے خدشات نے پولٹری صنعت کو مشکلات سے دوچار کر دیا ہے۔ ریاست کے اہم پولٹری مرکز نمکّل سے انڈوں کی برآمدات میں نمایاں کمی آئی ہے، جب کہ بیرونی خریداروں کی جانب سے آرڈر منسوخ کیے جانے کے باعث انڈوں کی قیمتیں بھی گر گئی ہیں۔ صورت حال یہ ہے کہ مرغی پالنے والوں کو انڈے پیداواری لاگت سے کم قیمت پر فروخت کرنے پڑ رہے ہیں، جس سے انہیں مالی نقصان کا سامنا کرنا پڑ سکتا ہے۔
پولٹری صنعت سے وابستہ افراد کے مطابق متحدہ عرب امارات، عمان اور جنوبی افریقہ سمیت کئی ممالک کے خریداروں نے برڈ فلو کے خدشات کے پیش نظر انڈوں کے آرڈر واپس لے لیے ہیں۔ اس کا براہ راست اثر تمل ناڈو کے نمکّل پر پڑا ہے، جو ملک میں انڈوں کی پیداوار اور برآمدات کا ایک اہم مرکز ہے۔
تمل ناڈو پولٹری فارمرس مارکیٹنگ سوسائٹی کے مطابق، تقریباً چھ ماہ پہلے تک نمکّل سے ہر ماہ 25 کروڑ انڈے برآمد کیے جا رہے تھے۔ بعد میں یہ تعداد گھٹ کر تقریباً 15 کروڑ رہ گئی اور اب اس میں مزید 50 فیصد کمی ریکارڈ کی گئی ہے۔ صنعت کے نمائندوں کا کہنا ہے کہ اگر بیرونی خریداروں کی جانب سے آرڈر منسوخ کرنے کا سلسلہ جاری رہا تو رواں ماہ چند کروڑ انڈے بھی برآمد کرنا مشکل ہو سکتا ہے۔
برآمدات میں کمی کے ساتھ انڈوں کی خریداری کی قیمتوں میں بھی مسلسل گراوٹ آئی ہے۔ نیشنل ایگ کوآرڈینیشن کمیٹی نے فی انڈہ قیمت 6.70 روپے سے کم کرکے 6 روپے کر دی ہے۔ 11 نومبر کو قیمت میں 20 پیسے کی کمی کی گئی تھی، جب کہ 13 اور 15 نومبر کو مزید 25، 25 پیسے گھٹائے گئے۔
پولٹری فارمرس کے مطابق ایک انڈے کی پیداواری لاگت تقریباً 6.50 روپے ہے۔ اس طرح موجودہ خریداری قیمت پیداواری لاگت سے 50 پیسے کم ہو گئی ہے۔ ان کا کہنا ہے کہ قیمتوں میں مزید کمی سے پولٹری فارمرس کے مالی مسائل بڑھ سکتے ہیں۔
دراصل انڈوں کی برآمدات پہلے ہی بین الاقوامی سطح پر مال برداری کے اخراجات میں اضافے اور نقل و حمل میں رکاوٹوں سے متاثر تھیں۔ ایران اور اسرائیل کے درمیان جنگ کے بعد پیدا ہونے والی صورت حال نے بھی برآمدی سرگرمیوں کو نقصان پہنچایا ہے۔ ان وجوہات کے باعث انڈوں کی بیرون ملک ترسیل معمول کی مقدار کے تقریباً 30 فیصد تک رہ گئی تھی۔ اب برڈ فلو کے خدشات نے صنعت کی مشکلات میں مزید اضافہ کر دیا ہے۔
تاہم، صنعت کے نمائندوں کا کہنا ہے کہ فی الحال پولٹری فارموں میں فروخت نہ ہونے والے انڈوں کا ذخیرہ جمع نہیں ہوا ہے۔ نیشنل ایگ کوآرڈینیشن کمیٹی نے مقامی سطح پر مانگ میں کمی کی ایک وجہ چھٹھ پوجا کے روزوں اور سبری مالا یاترا کے موسم کا آغاز بھی بتایا ہے۔ صنعت سے وابستہ افراد کو امید ہے کہ حالات بہتر ہونے کے ساتھ انڈوں کی قیمتیں دوبارہ مستحکم ہو جائیں گی۔
دوسری جانب نمکّل کے پولٹری فارمرس نے اپنے فارموں کو برڈ فلو سے محفوظ رکھنے کے لیے احتیاطی اقدامات تیز کر دیے ہیں۔ پولٹری شیڈز کی باقاعدگی سے صفائی اور جراثیم کش ادویات کا چھڑکاؤ کیا جا رہا ہے۔ باہر سے آنے والے افراد کی آمد و رفت محدود کر دی گئی ہے، جب کہ مرغیوں کے لیے چارہ لے جانے والی گاڑیوں کو فارم میں داخل ہونے سے پہلے جراثیم کش اسپرے سے صاف کیا جا رہا ہے۔
فارمرس کا کہنا ہے کہ کڈّالور میں جن پرندوں میں برڈ فلو کے اثرات سامنے آئے ہیں، وہ گوشت کے لیے پالی جانے والی مرغیاں (برائلر) تھیں، جب کہ نمکّل میں زیادہ تر انڈے دینے والی مرغیاں پالی جاتی ہیں۔ ان کے مطابق صفائی کے سخت انتظامات اور احتیاطی تدابیر کی بدولت نمکّل کا پولٹری مرکز اب تک محفوظ ہے اور پرندوں کی صحت کی نگرانی مزید سخت کر دی گئی ہے۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔