چوکیدار نے چوری کروائی، وہ چھپ سکتا ہے لیکن بھاگ نہیں سکتا: راہل گاندھی

لوک سبھا انتخابات کے پیش نظر انتخابی منشور جاری کرنے کے بعد کانگریس صدر راہل گاندھی نے ہندوستان کی معاشی حالت کو بہتر بنانے کے لیے تیار کچھ منصوبوں کا تذکرہ کیا۔ اس موقع پر انھوں نے کہا کہ ’’اس وقت ہندوستانی میں اکونومک ایمرجنسی لگی ہوئی ہے۔ پی ایم مودی نے نوٹ بندی، جی ایس ٹی لگایا ۔ ان سب سے ہندوستانی اکونومی بالکل پھنسی ہوئی ہے اور اس کو ’جمپ اسٹارٹ‘ کرنے کی ضرورت ہے۔‘‘ اس معاشی بدحالی سے ہندوستان کو باہر نکالنےکے لیے تیار کیے گئے منصوبوں کا تذکرہ کرتے ہوئےراہل گاندھی نے کہا کہ ’’حالات کو سازگار بنانے کے لیے ہم ’نیائے‘ کی شکل میں ایک تھیراپی استعمال کرنے والے ہیں اور غریبوں کو ڈائریکٹ اکاؤنٹ میں پیسہ دینے والے ہیں۔ اس سے وہ خریداری کریں گے اور اکونومی آگے بڑھے گی، معیشت کو فائدہ پہنچے گا۔‘‘

راہل گاندھی نے اس موقع پر ملک میں پھیلی بے روزگاری اور کسانوں کے بارے میں بھی تذکرہ کیا اور کہا کہ معیشت کی بدحالی کا سبب نوجوان اور کسان مخالف پالیسیاں ہیں۔ انھوں نے کہا کہ ’’ملک کی سچائی یہ ہے کہ ملک میں بے روزگاری ہے، ملک کا کسان تڑپ رہا ہے، خودکشی کر رہا ہے۔‘‘ کانگریس صدر نے مزید کہا کہ ’’ملک کی سچائی یہ ہے کہ نریندر مودی نے وعدہ کیا تھا ’اچھے دن‘ کا لیکن چوکیدار نے چوری کروائی ہے۔ اب چوکیدار چھپ سکتا ہے لیکن بھاگ نہیں سکتا۔‘‘