کورونا کی دہشت کے درمیان درجنوں بگلوں کی موت سے علی گڑھ میں خوف کا عالم

ایک طرف کورونا وائرس سے لوگوں میں دہشت کا عالم ہے اور دوسری طرف علی گڑھ میں درجنوں کی تعداد میں بگلوں کی ہلاکت کی خبر سامنے آئی ہے جس سے لوگوں کے درمیان چہ می گوئیاں شروع ہو گئی ہیں۔ لوگوں میں اس بات کو لے کر خوف پھیل گیا ہے کہ اب کورونا وائرس کے بعد کسی اور طرح کی وبا کا سامنا تو نہیں کرنا پڑے گا۔

واقعہ علی گڑھ شہر کے بھوجپورہ علاقے کا ہے جہاں جمعرات کی صبح اچانک ہی درجنوں کی تعداد میں بگلے مرے ہوئے دیکھے گئے۔ جن لوگوں نے ان مرے ہوئے بگلوں کو دیکھا، انھوں نے مقامی لوگوں کو اس کی خبر دی اور پھر دھیرے دھیرے یہ خبر چاروں طرف پھیل گئی۔ بگلوں کو دیکھنے کے لیے بھیڑ بھی جمع ہو گئی لیکن سبھی دور کھڑے ہی اسے دیکھتے رہے کیونکہ انھیں اندیشہ تھا کہ کہیں یہ بگلے کسی بیماری کی وجہ سے نہ مرے ہوں اور چھونے سے یہ بیماری انسانوں میں پھیلنے لگے۔

مقامی لوگوں نے بڑی تعداد میں بگلوں کے مرے ہونے کی خبر پولس انتظامیہ کو دے دی ہے اور موقع پر محکمہ مویشی پروری کے ساتھ ساتھ انتظامیہ کی ٹیمیں بھی پہنچ گئی ہیں۔ افسران نے لوگوں کو مشورہ دیا ہے کہ فی الحال وہ بگلوں کے رابطے میں آنے سے بچیں اور جن مقامات پر بگلے مرے ہوئے ملے ہیں وہاں سے کچھ دوری بنا کر رکھیں۔