دیوالی سے قبل مٹھائیوں کی دکانوں اور تیاری کے مراکز پر چھاپے، دہلی میں 402 کلوگرام غذائی اشیا تلف

نئی دہلی: دیوالی سے قبل مٹھائیوں کے معیار اور غذائی تحفظ کو یقینی بنانے کے لیے ملک کی مختلف ریاستوں میں جانچ مہم تیز کر دی گئی ہے۔ دہلی میں فوڈ سیفٹی ڈپارٹمنٹ نے بغیر لائسنس رس گلے بنانے والی اکائیوں پر چھاپہ مار کر 402 کلوگرام غذائی اشیا تلف کر دیں، جبکہ موری گیٹ کھویا منڈی میں 520 کلوگرام خراب کھویا اور چھینا بھی تباہ کر دیا گیا۔ تلنگانہ، بہار اور مہاراشٹر میں بھی غذائی تحفظ کے ضوابط کی خلاف ورزیوں پر کارروائی کی گئی ہے۔

وزیر اعلیٰ ریکھا گپتا کی قیادت والی دہلی حکومت کی ہدایت پر فوڈ سیفٹی ڈپارٹمنٹ نے نہال وہار علاقے میں بغیر لائسنس رس گلے بنانے والی اکائیوں کے خلاف چھاپہ مارا۔ وزیر اعلیٰ دفتر (سی ایم او) کے مطابق، اس کارروائی کا مقصد غذائی اشیا کے معیار اور حفاظت کو یقینی بنانا ہے۔ چھاپے کے دوران مختلف غذائی اشیا کے نمونے بھی جمع کیے گئے، جنہیں جانچ کے لیے بھیج دیا گیا ہے۔

تلنگانہ اسٹینڈرڈز اتھارٹی فار فوڈ اینڈ اسینشل ڈرگس (ٹی جی سیف) نے ریاست کے تمام اضلاع میں مٹھائیوں کی تیاری اور فروخت سے وابستہ اداروں کا خصوصی معائنہ کیا۔ اتھارٹی کے مطابق، 23 اکتوبر کو چلائی گئی مہم کے دوران مجموعی طور پر 53 اکائیوں کی جانچ کی گئی۔ اس دوران متعدد مقامات پر غذائی تحفظ کے ضوابط کی خلاف ورزیاں سامنے آئیں۔

معائنے کے دوران بعض اداروں میں فرش ٹوٹے ہوئے پائے گئے، جبکہ جگہ جگہ غذائی فضلہ بکھرا تھا۔ صفائی کے مقامات گندے تھے اور نالیوں میں غذائی کچرا جمع تھا۔ دیواروں پر گندگی اور کھانے پینے کی اشیا کے باقیات بھی ملے۔ بعض اداروں میں کیڑوں پر قابو پانے کے انتظامات اور مٹھائیاں تیار کرنے والے ملازمین کی صحت سے متعلق ریکارڈ دستیاب نہیں تھے۔

کچھ ملازمین بغیر ہیئر نیٹ اور دستانوں کے کام کرتے ہوئے پائے گئے۔ اس کے علاوہ ایگزاسٹ اور چمنیوں پر چکنائی جمع تھی۔ بعض مقامات پر غذائی اشیا فرش پر رکھی گئی تھیں اور کھانے پینے کی اشیا کے ساتھ غیر غذائی سامان بھی رکھا ہوا تھا۔

بہار میں بھی محفوظ اور معیاری غذائی اشیا کی دستیابی یقینی بنانے کے لیے خصوصی مہم چلائی جا رہی ہے۔ ریاستی محکمۂ صحت کے مطابق، اب تک 531 غذائی اداروں کا معائنہ کیا جا چکا ہے۔ ضوابط کی خلاف ورزی پر دو اداروں کے لائسنس معطل کر دیے گئے ہیں، جبکہ 15 دیگر اداروں کے خلاف قانونی کارروائی شروع کی گئی ہے۔

معائنے کے دوران خراب پنیر، بدبودار مٹھائیاں اور میعاد ختم ہو چکا دودھ سمیت متعدد غیر معیاری غذائی اشیا کے معاملات سامنے آئے ہیں۔ محکمہ اس مہم کے ذریعے غذائی اشیا کی تیاری، ذخیرہ اندوزی اور فروخت میں مقررہ معیارات پر عمل درآمد یقینی بنانے کی کوشش کر رہا ہے۔

مہاراشٹر میں بھی فوڈ اینڈ ڈرگ ایڈمنسٹریشن (ایف ڈی اے) نے خصوصی مہم کے دوران تقریباً 35.547 ٹن غذائی اشیا کا ذخیرہ ضبط کیا ہے۔ ضبط کیے گئے اسٹاک کی تخمینہ شدہ قیمت 79.97 لاکھ روپے بتائی گئی ہے۔

حکام کے مطابق، اس کارروائی کا مقصد ممکنہ طور پر غیر محفوظ غذائی اشیا کی فروخت اور تقسیم پر روک لگانا اور غذائی تحفظ کے ضوابط پر عمل درآمد یقینی بنانا ہے۔ دیوالی سے قبل مختلف ریاستوں میں جاری ان کارروائیوں کے ذریعے مٹھائیوں سمیت دیگر غذائی اشیا کے معیار اور صفائی کے انتظامات کی جانچ کی جا رہی ہے۔