کیا اسرائیل دورہ پر وزیر اعظم مودی کو ایران پر حملے کا علم تھا؟ راجیہ سبھا میں حکومت نے دیا جواب

راجیہ سبھا میں ایک تحریری جواب میں ہندوستانی حکومت نے واضح کیا ہے کہ وزیر اعظم نریندر مودی کے حالیہ اسرائیل دورہ کے دوران ایران پر ہوئے حملے کے متعلق کوئی بات چیت نہیں ہوئی تھی اور نہ ہی اس بارے میں کوئی معلومات شیئر کی گئی تھیں۔ راجیہ سبھا میں ایک سوال کے تحریری جواب میں وزیر مملکت برائے خارجہ امور کیرتی وردھن سنگھ نے یہ معلومات فراہم کیں۔ یہ سوال ’آئی یو ایم ایل‘ رکن پارلیمنٹ عبد الوہاب نے پوچھا تھا۔

راجیہ سبھا رکن عبد الوہاب نے پوچھا کہ کیا حکومت کو اگلے دن ایران پر ہونے والے حالیہ فوجی حملے کا علم تھا؟ اس کے جواب میں وزیر مملکت برائے خارجہ امور کیرتی وردھن سنگھ نے کہا کہ وزیر اعظم کو اس کے متعلق کوئی جانکاری نہیں تھی۔ سنگھ نے بتایا کہ وزیر اعظم مودی نے 25 اور 26 فروری 2026 کو اسرائیل کے وزیر اعظم کی دعوت پر وہاں کا سرکاری دورہ کیا تھا۔

کیرتی وردھن سنگھ نے مزید کہا کہ اسرائیل دورہ کے دوران دونوں ممالک کے درمیان آرٹیفیشل انٹیلی جنس، سائبر سیکورٹی، زراعت، تعلیم اور ڈیجیٹل ادائیگی جیسے کئی اہم شعبوں میں معاہدوں پر دستخط ہوئے، لیکن علاقائی حملوں سے متعلق کسی بھی موضوع پر کوئی بات چیت نہیں ہوئی۔ حکومت نے یہ بھی واضح کیا کہ ہندوستان مغربی ایشیا کی صورتحال پر گہری نظر رکھے ہوئے ہے۔ وزیر اعظم اور وزیر خارجہ نے مغربی ایشیا کے کئی رہنماؤں سے بات چیت کی ہے۔

وزیر مملکت برائے خارجہ امور کیرتی وردھن سنگھ نے کہا کہ جب سے ایران جنگ شروع ہوئی ہے، تب سے وزیر اعظم مسلسل متحرک ہیں اور مغربی ایشیا کے مختلف رہنماؤں سے بات کر رہے ہیں۔ اس دوران وزیر اعظم مودی نے جن رہنماؤں سے بات کی ہے ان میں اسرائیل، ایران، سعودی عرب، بحرین، کویت، عمان، قطر، متحدہ عرب امارات، اردن اور امریکہ کے سربراہان شامل ہیں۔ اسی دوران وزیر خارجہ نے بھی اپنے ہم منصبوں سے بات چیت کی۔

راجیہ سبھا میں کیرتی وردھن سنگھ نے مزید کہا کہ مشرق وسطیٰ میں جاری کشیدگی کے پیش نظر حکومت نے اب تک تقریباً 4 لاکھ 75 ہزار ہندوستانیوں کی محفوظ واپسی کو یقینی بنایا ہے اور توانائی کی سپلائی برقرار رکھنے کے لیے خلیجی خطے میں جہازوں کی محفوظ نقل و حمل کے انتظامات کیے ہیں۔ قابل ذکر ہے کہ رواں سال فروری میں وزیر اعظم مودی کے دورہ اسرائیل کے وقت کو لے کر یہ قیاس آرائیاں کی جا رہی تھیں کہ انہیں شاید ایران پر ہونے والے ممکنہ حملے کی پہلے سے اطلاع تھی۔