دہلی کا انتہائی مطلوبہ گینگسٹر کالا جٹھیڑی گرفتار، سر پر 7 لاکھ کا انعام تھا

نئی دہلی: دہلی پولیس کے اسپیشل سیل نے قومی راجدھانی کے انتہائی مطلوبہ گینگسٹر کالا جٹھیڑی کو گرفتار کر لیا ہے۔ کالا کے سر پر 7 لاکھ روپے کا انعام رکھا گیا تھا۔ سندیپ کالا عرف کالا جٹھیڑی سونی پت کا رہائشی ہے۔ پولیس کو پہلے شبہ تھا کہ وہ بیرون ملک سے گینگ چلا رہا ہے لیکن معلوم چلا کہ وہ ہریانہ میں ہی چھپا ہوا تھا، تاہم گزشتہ روز اسے یوپی کے سہرانپور سے گرفتار کیا گیا۔

ڈی سی پی سپیشل سیل منیشی چندرا نے بتایا کہ سپیشل سیل کی طرف سے کافی وقت کے کالا کو گرفتار کرنے کی کوششیں کی جا رہی تھیں۔ اس دوران ٹیکنیکل سرویلانس کے ذریعے انکشاف ہوا کہ وہ سہارنپور میں چھپا ہوا ہے، جہاں سے جمعہ کے روز اسے گرفتار کر لیا گیا۔ ملزم نے پولیس کی گرفت سے نکل کر فرار ہونے کی کوشش کی لیکن ٹیم نے اسے پسٹل کے ساتھ موقع پر ہی دبوچ لیا۔ اسپیشل سیل کی ٹیم فی الحال کالا سے پوچھ گچھ کر رہی ہے۔

خیال رہے کہ پہلوان ساگر دھنکڑ قتل کیس میں کالا جٹھیڑی کے بھتیجے سونو مہال کی سشیل پہلوان نے پٹائی کر دی تھی۔ جس کے بعد کالا نے سشیل کو قتل کرنے کی دھمکی دی تھی۔ تاہم، سشیل اور کالا پہلے دوست تھے اور سشیل پہلوان کالا کے بھائی کی شادی میں بھی شریک ہوا تھا۔

شبہ ظاہر کیا گیا ہے کہ کالا جٹھیڑی کا ساتھی وریندر پرتاپ عرف کالا رانا تھائی لینڈ میں بیٹھا ہے۔ جبکہ اس کا دوسرا ساتھی گینگسٹر گولڈی برار کینیڈا میں بیٹھ کر گینگ چلا رہا ہے۔ گزشتہ 10 مہینوں کے دوران کالا جٹھیڑی گینگ نے دہلی، ہریانہ، پنجاب اور راجستھان میں کم از کم 25 قتل کی واردات انجام دی ہیں۔ کالا جٹھیڑی گینگسٹر لارنس ویشنوئی کا بھی خاص ہے اور وہ مل کر 100 سے زیادہ بدمعاشوں کا گینگ چلا رہے ہیں۔