دہلی میں فضائی آلودگی پر قابو پانے کے لیے منصوبہ نہیں، مؤثر عمل درآمد ضروری: ماہر ماحولیات

نئی دہلی: راجدھانی دہلی میں فضائی آلودگی کی سنگین صورت حال کے درمیان ماہر ماحولیات سنیل دہیا نے خبردار کیا ہے کہ آلودگی پر قابو پانے کے لیے محض منصوبے بنانا کافی نہیں، بلکہ ان پر مؤثر طریقے سے عمل درآمد ضروری ہے۔ آئی اے این ایس کی رپورٹ کے مطابق، انہوں نے کہا کہ دیوالی کی رات پٹاخوں کے باعث آلودگی اس قدر بڑھ گئی تھی کہ کئی مقامات پر مرکزی آلودگی کنٹرول بورڈ (سی پی سی بی) نے اپنے ڈیٹابیس میں ایک ہزار سے زیادہ کی قدروں کو دکھانا بند کر دیا تھا، جب کہ دہلی آلودگی کنٹرول کمیٹی (ڈی پی سی سی) کے اعداد و شمار میں یہ قدریں موجود تھیں۔

ماہر ماحولیات اور انوائروکیٹالسٹس کے بانی سنیل دہیا نے کہا کہ دیوالی کے موقع پر پٹاخوں سے پیدا ہونے والی آلودگی نمایاں طور پر سامنے آ جاتی ہے، لیکن دہلی میں آلودگی کا مسئلہ صرف دیوالی یا پرالی جلانے کے واقعات تک محدود نہیں ہے۔ اکتوبر اور نومبر میں ہوا کی رفتار کم ہونے اور پرالی جلانے کے واقعات سے صورت حال مزید خراب ہو جاتی ہے، جب کہ صنعتوں، بجلی گھروں اور دیگر ذرائع سے سال بھر آلودگی پھیلتی رہتی ہے۔

انہوں نے بتایا کہ دیوالی کے روز دوپہر میں بھی دہلی میں پی ایم 2.5 کی سطح تقریباً 135 مائیکروگرام فی مکعب میٹر ریکارڈ کی گئی تھی، جو ہندوستان کے یومیہ مقررہ معیار سے دو گنا سے زیادہ اور عالمی ادارہ صحت (ڈبلیو ایچ او) کے معیار سے تقریباً نو گنا زیادہ تھی۔ ان کے مطابق یہ اعداد و شمار ظاہر کرتے ہیں کہ آلودگی دہلی میں سال بھر برقرار رہتی ہے اور صرف مانسون کے دوران بارش سے کچھ راحت ملتی ہے۔

سنیل دہیا نے کہا کہ فضائی آلودگی صرف دہلی کا مسئلہ نہیں، بلکہ پاکستان کے پنجاب سے مغربی بنگال اور بنگلہ دیش تک پھیلے گنگا کے میدانی علاقوں میں بھی یہ ایک سنگین چیلنج ہے۔ ان کے مطابق پٹاخوں اور پرالی جلانے پر تو بحث ہوتی ہے، لیکن سال بھر آلودگی پھیلانے والے ذرائع پر خاطر خواہ توجہ نہیں دی جاتی۔

انہوں نے کہا کہ صنعتیں، تھرمل پاور پلانٹس، دیہی علاقوں میں کھانا پکانے کے روایتی طریقے، رہائشی علاقوں میں کچرا اور ایندھن جلانا، نیز شہری و دیہی علاقوں میں کچرے کا ناقص انتظام آلودگی کی بڑی وجوہات ہیں۔ یہ تمام ذرائع 24 گھنٹے اور سال بھر ماحول کو آلودہ کرتے رہتے ہیں، لیکن ان پر ابھی تک مؤثر کنٹرول نہیں ہو سکا ہے۔

ماہر ماحولیات نے کہا کہ دہلی حکومت کے ونٹر ایکشن پلان کے تحت اس بار تقریباً چھ ماہ پہلے ہی آلودگی سے نمٹنے کے اقدامات کا اعلان کیا گیا تھا۔ تاہم، گریپ کے دوسرے، تیسرے اور چوتھے مرحلے کے تحت پارکنگ فیس میں اضافہ، تعمیراتی سرگرمیوں پر پابندی، دفاتر میں ملازمین کی تعداد محدود کرنے اور بی ایس 4 گاڑیوں کے استعمال پر روک جیسے اقدامات کے باوجود مطلوبہ نتائج حاصل نہیں ہو سکے۔

انہوں نے دیوالی کے موقع پر ضابطوں کی خلاف ورزی کو بھی تشویش ناک قرار دیا۔ ان کے مطابق سپریم کورٹ کی ہدایت کے باوجود رات 10 بجے کے بعد بھی پٹاخے جلائے گئے اور دہلی میں آلودگی کی بلند ترین سطح رات ایک بجے ریکارڈ کی گئی۔ اس کے علاوہ گرین پٹاخوں پر لگے کئی کیو آر کوڈ بھی جعلی ہونے کی اطلاعات سامنے آئیں۔