دہلی حکومت نے ڈی ڈی اے کو مہرولی میں توڑ پھوڑ روکنے کی ہدایت دی

دہلی کے وزیر محصول کیلاش گہلوت نے کہا کہ نئے سرے سے حد بندی کئے جانے تک مہرولی میں رہنے والے مکینوں کوبے گھر نہیں کیا جا سکتا ہے۔

مسٹرگہلوت نے متنازعہ علاقے کی نئی حد بندی کا حکم دیا ہے۔ وزیر ریونیو نے کہا ہے کہ بغیر کسی نوٹس کے قابضین کو اندھیرے میں رکھ کر حد بندی کی گئی ہے۔ انہوں نے ضلع مجسٹریٹ (جنوبی) کو زمین کی نئے سرے سے حد بندی کرنے اور ڈی ڈی اے کو فوری طور پراس کے بارے میں مطلع کرنے کی ہدایت دی ہے۔ انہوں نے کہا کہ نئے سرے سے حد بندی کئے جانے تک مہرولی میں رہنے والے مکینوں کوبے گھر نہیں کیا جا سکتاہے۔

انہوں نے اس سلسلے میں متعلقہ افسران کی میٹنگ طلب کی۔ میٹنگ میں یہ بات سامنے آئی کہ محکمہ نے حد بندی کے عمل کے دوران مذکورہ افراد کو نوٹس جاری نہیں کیے تھے۔ حد بندی کے طریقہ کار کو درست نہ بتاتے ہوئے کیلاش گہلوت نے کہا کہ لاڈو سرائے گاؤں ایک گنجان آباد علاقہ ہے اور گاؤں میں مکانات بہت پرانے ہیں۔

وزیر ریونیو نے حکم دیا ہے کہ اس قواعد کے دوران جن افراد کے متاثر ہونے کا خدشہ ہے، انہیں منصفانہ اور شفافیت کے لئے حد بندی کے دوران موجود رہنے کے لئے کہا جا سکتا ہے۔ ڈی ایم (جنوبی) کوڈی ڈی اے حکام کو اس حکم کے بارے میں فوری طور پر مطلع کرنے کے لئے کہاگیا ہے اور یہ کہ ایک نئی حد بندی کی جائے گی۔

واضح رہے کہ ڈی ڈی اے نے مہرولی واقع آرکیالوجیکل پارک میں جمعہ کو تجاوزات مخالف مہم شروع کی تھی جو ہفتہ کو بھی جاری رہی۔