دہلی: پولیس اور بدمعاشوں کے درمیان تصادم، فائرنگ میں 2 کی موت

راجدھانی دہلی کے باہری-شمالی ضلع میں پولیس اور بدمعاشوں کے درمیان ہفتہ کی صبح زبردست تصادم ہوا۔ اس دوران فائرنگ میں پولیس کی گولی لگنے سے 2 بدمعاشوں کی موت ہو گئی۔ بتایا جاتا ہے کہ یہ بدمعاش علاقے میں ڈکیتی کی واردات کو انجام دینے کے لیے آئے تھے۔ پولیس اور بدمعاشوں کے درمیان اچانک ہوئی فائرنگ کے واقعہ سے علاقے میں دہشت کا ماحول پیدا ہو گیا۔

ذرائع سے ملی اطلاع کے مطابق کئی بدمعاش علاقے میں ڈکیتی کی واردات کو انجام دینے کے لیے آئے تھے۔ اس درمیان پولیس کو اس کی اطلاع ملی اور ٹیم نے انہیں گھیر لیا جس کے بعد بدمعاشوں نے فائرنگ شروع کر دی۔ پولیس نے بھی بدمعاشوں پر جوابی کارروائی کرتے ہوئے کئی راؤنڈ گولیاں چلائیں۔ اس فائرنگ میں 2 بدمعاشوں کو گولی لگ گئی اور وہ بُری طرح سے زخمی ہو گئے۔ اس کے بعد بدمعاشوں کو اسپتال میں داخل کرایا گیا جہاں ڈاکٹروں نے انہیں مردہ قرار دے دیا۔

وہیں دہلی کے نریلا علاقے میں ہوئے تصادم کے دوران پولیس نے 5 بدمعاشوں کو گرفتار کر لیا ہے۔ یہ تصادم نریلا انڈسٹریل تھانہ علاقے کے کھیڑا گاؤں کے پاس ہوا۔ پکڑے گئے بدمعاش لمبے وقت سے انڈسٹریل علاقے کے گوداموں کو نشانہ بنا رہے تھے اور چوری و لوٹ پاٹ کی واردات کو انجام دے رہے تھے۔

اطلاع کے مطابق دہلی پولیس کو ان بدمعاشوں کی موومنٹ کی اطلاع ملی تھی جس کے بعد نریلا انڈسٹریل تھانہ پولیس نے علاقے میں گھیرا بندی کر دی۔ رات کے وقت جب پولیس ٹیم نے بدمعاشوں کو دیکھا تو انہیں خودسپردگی کرنے کے لیے کہا لیکن بدمعاشوں نے خودسپردگی کرنے کے بجائے پولیس پر گولی چلانی شروع کر دی۔ اس کے بعد جوابی کارروائی میں پولیس نے بھی فائرنگ کی۔ اس تصادم کے بعد پولیس نے 5 بدمعاشوں کو اپنی حراست میں لے لیا۔