مانسون اجلاس سے دہلی اسمبلی ملک کی پہلی ڈیجیٹل اسمبلی بن جائے گی: وجیندر گپتا

دہلی اسمبلی کے بجٹ اجلاس کے تیسرے دن اسپیکر وجیندر گپتا نے ای اسمبلی پروجیکٹ کے جلد نفاذ کا اعلان کیا۔ انہوں نے کہا کہ اگلے سو دنوں میں اسے مکمل طور پر نافذ کرنے کی کوشش کی جائے گی تاکہ مانسون سیشن ای-اسمبلی ایپلی کیشن 'NEVA' کے ذریعہ منعقد کیا جا سکے۔

اسپیکر نے بتایا کہ 22 مارچ 2025 کو دہلی قانون ساز اسمبلی اور حکومت ہند کی پارلیمانی امور کی وزارت کے درمیان ایک معاہدہ (ایم او یو) پر دستخط ہوئے ہیں۔ اس معاہدے کے تحت مرکزی  حکومت پورے منصوبے کا مالی بوجھ برداشت کرے گی۔ ای اسمبلی کے نفاذ کے بعد تمام کام آن لائن اور پیپر لیس ہو جائیں گے جس سے نہ صرف کام کے عمل میں تیزی آئے گی بلکہ شفافیت میں بھی اضافہ ہوگا۔

اسپیکر  وجیندر گپتانے کہا کہ ای اسمبلی کے نفاذ کے بعد اراکین اسمبلی کو آن لائن نوٹس جمع کرانے اور ایوان سے متعلق تمام ریکارڈ موبائل یا ٹیبلٹ پر حاصل کرنے کی سہولت حاصل ہوگی۔ اس کے علاوہ یہ ڈیجیٹل سسٹم سوال و جواب، مباحث، قانون سازی کے کاموں اور کمیٹی سے متعلق معاملات کو مؤثر طریقے سے نمٹانے میں مدد دے گا۔ انہوں نے یہ بھی کہا کہ یہ ایپلی کیشن ٹچ اسکرین ڈیسک ٹاپ، موبائل اور ٹیبلٹس پر دستیاب ہوگی۔ ہر ایم ایل اے کی سیٹ پر ایک ٹچ اسکرین ڈیوائس لگائی جائے گی، تاکہ وہ تمام ضروری دستاویزات کو ڈیجیٹل شکل میں دیکھ سکیں۔

اسپیکر وجیندر گپتا نے کہا کہ ارکان اسمبلی اور عملے کے لیے ای-اسمبلی  کو مؤثر طریقے سے نافذ کرنے کے لیے تربیتی سیشن منعقد کیے جائیں گے۔ اس کے تحت اسمبلی سیکرٹریٹ میں ایک مستقل سہولت مرکز بھی قائم کیا جائے گا، جہاں ایم ایل اے ڈیجیٹل عمل کو سمجھ سکیں گے اور ایپلیکیشن کا استعمال سیکھ سکیں گے۔

اسمبلی کے اسپیکر نے کہا کہ ای اسمبلی کے نفاذ سے دہلی اسمبلی کا کام کرنے کا نظام جدید اور شفاف ہو جائے گا۔ اس سے نہ صرف اراکین اسمبلی کو معلومات تک فوری رسائی حاصل ہوگی بلکہ ایوان کی کارروائی میں بھی تیزی آئے گی۔ حکومت کا یہ قدم ڈیجیٹل انڈیا مشن کو مضبوط بنانے کے ساتھ ساتھ ماحولیاتی تحفظ کی سمت میں بھی اہم ثابت ہوگا۔ کاغذ کے بغیر عمل سے کاغذ کی کھپت میں کمی آئے گی جس سے ماحولیات کو بھی فائدہ ہوگا۔اسمبلی کے اسپیکر نے تمام اراکین اسمبلی اور محکموں سے اپیل کی کہ وہ ای اسمبلی کو کامیاب بنانے کے لیے مل کر کام کریں۔ اس اسکیم کے نفاذ کے بعد دہلی ملک کی پہلی مکمل ڈیجیٹل اسمبلی بننے کی طرف بڑھے گی۔