الیکشن کمیشن نے کیا دہلی اسمبلی انتخابات کی تاریخوں کا اعلان، 5 فروری کو ایک مرحلہ میں ووٹنگ

نئی دہلی: الیکشن کمیشن نے دہلی اسمبلی انتخابات 2025 کے شیڈول کا اعلان کر دیا ہے۔ چیف الیکشن کمشنر راجیو کمار نے پریس کانفرنس میں بتایا کہ دہلی میں 70 اسمبلی حلقوں میں ایک ہی مرحلے میں انتخابات کرائے جائیں گے۔ ووٹنگ 5 فروری 2025 بروز بدھ ہوگی، جبکہ ووٹوں کی گنتی 8 فروری 2025 کو ہوگی۔

پریس کانفرنس میں جاری تفصیلات کے مطابق، انتخابات کا گزٹ نوٹیفکیشن 10 جنوری 2025 کو جاری ہوگا۔ نامزدگی داخل کرنے کی آخری تاریخ 17 جنوری مقرر کی گئی ہے، جبکہ نامزدگیوں کی جانچ پڑتال 18 جنوری کو کی جائے گی۔ امیدواروں کو 20 جنوری تک نام واپس لینے کی اجازت ہوگی۔ ووٹنگ 5 فروری کو ہوگی اور ووٹوں کی گنتی 8 فروری کو ہوگی۔ انتخابی عمل 10 فروری تک مکمل کر لیا جائے گا۔

الیکشن کمیشن نے انتخابات کے دوران شفافیت اور منصفانہ عمل کو یقینی بنانے کے لیے تمام تیاریاں مکمل کرنے کا دعویٰ کیا ہے۔ انتخابی ضابطہ اخلاق فوری طور پر نافذ ہو چکا ہے، جس کے تحت سرکاری اسکیموں کے اعلانات اور دیگر ترقیاتی کاموں پر پابندی عائد کر دی گئی ہے۔ چیف الیکشن کمشنر نے عوام سے اپیل کی کہ وہ جمہوریت کو مضبوط بنانے کے لیے اپنے حق رائے دہی کا استعمال کریں۔

نئی دہلی: چیف الیکشن کمشنر راجیو کمار نے ای وی ایم سے چھیڑ چھاڑ کے الزامات کو مسترد کرتے ہوئے کہا ہے کہ ان باتوں میں کوئی دم نہیں۔ انہوں نے واضح کیا کہ عدالتوں نے بھی مانا ہے کہ ای وی ایم کو ہیک نہیں کیا جا سکتا۔ تاہم، انتخابات کے دوران بار بار مشینوں پر شبہات ظاہر کرنے کی کوشش کی گئی۔

راجیو کمار نے بتایا کہ انتخابات سے سات سے آٹھ دن پہلے ای وی ایم تیار کی جاتی ہیں، جنہیں سیاسی جماعتوں کے ایجنٹوں کی موجودگی میں سیل کیا جاتا ہے۔ ووٹنگ کے بعد بھی ای وی ایم کو مکمل شفافیت کے ساتھ سیل کیا جاتا ہے۔ انہوں نے زور دے کر کہا کہ ای وی ایم میں غیر قانونی ووٹ ڈالنے کا امکان نہیں ہوتا، اور پورا عمل شفافیت پر مبنی ہے۔

چیف الیکشن کمشنر راجیو کمار نے ووٹر لسٹ میں غلط اندراجات کے الزامات پر افسوس کا اظہار کیا ہے۔ انہوں نے کہا کہ ان الزامات کو سن کر دکھ ہوا۔ کچھ حلقوں کی جانب سے انتخابات کو ’ای وی ایم انتخاب‘ کہا گیا، جبکہ ووٹر لسٹ سے نام حذف کرنے اور سست رفتار ووٹ شماری کے الزامات بھی عائد کیے گئے ہیں۔ راجیو کمار نے کہا کہ شفافیت ہمیشہ الیکشن کمیشن کی اولین ترجیح رہی ہے اور عوامی خدشات کا جواب دینا ان کی ذمہ داری ہے۔ انہوں نے مزید کہا کہ انتخابی عمل کو شفاف بنانے کے لیے ہر ممکن اقدامات کیے جا رہے ہیں۔

دہلی اسمبلی انتخابات کی تاریخوں کے اعلان کے لیے دہلی کے وگیان بھون میں الیکشن کمیشن کی پریس کانفرنس شروع ہو گئی ہے۔ اپنے خطاب کا آغاز کرتے ہوئے چیف الیکشن کمشنر راجیو کمار نے اعلان کیا کہ یہ ان کی آخری پریس کانفرنس ہے۔ یاد رہے کہ راجیو کمار فروری میں اپنے عہدے سے سبکدوش ہو رہے ہیں۔

دہلی اسمبلی انتخابات کی تاریخوں کا اعلان آج ہونے والا ہے۔ الیکشن کمیشن دوپہر دو بجے پریس کانفرنس کے ذریعے انتخابات کی مکمل تفصیلات پیش کرے گا۔ دہلی کی 70 اسمبلی نشستوں پر آئندہ ماہ انتخابات متوقع ہیں، جہاں عام آدمی پارٹی، بھارتیہ جنتا پارٹی اور کانگریس کے درمیان سخت مقابلہ ہوگا۔

پیر کو الیکشن کمیشن نے دہلی کی حتمی ووٹر لسٹ جاری کی، جس کے مطابق اس مرتبہ دہلی میں کل 1 کروڑ 55 لاکھ 24 ہزار 858 ووٹرز رجسٹرڈ ہیں۔ ان میں مرد ووٹرز کی تعداد 83,49,645، خواتین ووٹرز کی تعداد 71,73,952 جبکہ تھرڈ جینڈر ووٹرز کی تعداد 1,261 ہے۔

یہ ووٹر لسٹ اس وقت جاری کی گئی جب ووٹرز کے نام ہٹانے کے الزامات کا تنازع سامنے آیا تھا۔ عام آدمی پارٹی کے سربراہ اور سابق وزیر اعلیٰ اروند کیجریوال نے کچھ دن پہلے بی جے پی پر ووٹر لسٹ سے نام خارج کرنے کے لیے درخواستیں جمع کرانے کا الزام لگایا تھا۔

الیکشن کمیشن کے مطابق، 2020 کے اسمبلی انتخابات کے مقابلے میں اس بار دہلی میں 7.26 لاکھ نئے ووٹرز شامل ہوئے ہیں، جبکہ 2024 کے لوک سبھا انتخابات کے مقابلے میں ووٹرز کی تعداد میں 3.10 لاکھ کا اضافہ ہوا ہے۔

دہلی کے پچھلے دو اسمبلی انتخابات میں عام آدمی پارٹی نے شاندار کارکردگی دکھائی۔ 2015 میں 67 نشستیں جیت کر حکومت بنائی، جو دہلی کی تاریخ میں سب سے بڑی کامیابی تھی۔ 2020 میں پارٹی نے 62 سیٹوں پر کامیابی حاصل کی۔ بی جے پی کو 8 نشستیں ملیں، جبکہ کانگریس پچھلے دو انتخابات میں ایک بھی نشست نہیں جیت سکی۔

بی جے پی، عام آدمی پارٹی اور کانگریس نے انتخابات کے لیے پوری طاقت لگا دی ہے۔ پچھلے پانچ دنوں میں وزیر اعظم مودی نے دو بڑی ریلیاں کی ہیں اور دہلی والوں کو بڑی تحفے دیے ہیں۔ اس سے یہ سمجھا جا سکتا ہے کہ بی جے پی دہلی کی تخت سے 27 سال کا خشک سالی دور کرنے کی بھرپور کوشش کر رہی ہے۔ عام آدمی پارٹی بھی اپنے اقتدار کو برقرار رکنے کی تک دو میں لگی ہوئی ہے، جبکہ عوام کا ایک بڑا حصہ کانگریس کو اپنی حمایت دے رہا ہے، جس سے مقابلہ دلچسپ ہو گیا ہے۔

سابق وزیر اعلیٰ اروند کیجریوال اس بار بھی نئی دہلی اسمبلی سیٹ سے انتخابی میدان میں ہیں۔ اس بار ان کا مقابلہ کانگریس کے سندیپ دکشت اور بی جے پی کے پریش ورما سے ہے۔ کیجریوال نے ہمیشہ اس سیٹ سے انتخاب لڑا ہے اور یہاں ان کی مضبوط گرفت رہی ہے۔

نئی دہلی سیٹ کو وی آئی پی سیٹ سمجھا جاتا ہے، جس کی وجہ سے بی جے پی اور کانگریس دونوں نے اپنے اہم رہنماؤں کو امیدوار کے طور پر میدان میں اتارا ہے جس سے مقابلہ اور بھی دلچسپ ہو گیا ہے۔ دوسری طرف وزیر اعلیٰ آتیشی کالکاجی سیٹ سے انتخاب لڑ رہی ہیں جہاں ان کا مقابلہ کانگریس کی علکٰا لامبا اور بی جے پی کے سابق رکن پارلیمنٹ رمیش بدھوری سے ہوگا۔