راجیہ سبھا کے لیے کانگریس نے جاری کی امیدواروں کی فہرست، پارٹی نے ابھیشیک منو سنگھوی کو دوبارہ بنایا امیدوار

کانگریس نے راجیہ سبھا کے 2 سالہ انتخاب کے لیے امیدواروں کی فہرست جاری کر دی ہے۔ اس فہرست میں کئی بڑے اور تجربہ کار نام شامل ہیں۔ کانگریس پارٹی نے تلنگانہ سے 2 ناموں کا اعلان کیا ہے۔ پارٹی کے سینئر رہنما اور سپریم کورٹ کے معروف وکیل ابھیشیک منو سنگھوی کو دوبارہ نامزد کیا گیا ہے۔ سنگھوی پہلے بھی راجیہ سبھا کے رکن رہ چکے ہیں۔

تلنگانہ سے کانگریس کے دوسرے راجیہ سبھا امیدوار ہیں ویم نریندر ریڈی۔ وہ وزیر اعلیٰ ریونت ریڈی کے قریبی مشیر ہیں۔ ان کی قربت اور ریاست میں پارٹی کی مضبوط پوزیشن کو مدنظر رکھتے ہوئے یہ فیصلہ کیا گیا ہے۔ دونوں امیدوار 16 مارچ کو ہونے والے انتخاب میں تلنگانہ کی 2 نشستوں کے لیے مقابلہ کریں گے۔ پارٹی کو امید ہے کہ ان دونوں کو آسانی سے جیت ملے گی۔

چھتیس گڑھ سے پھولو دیوی نیتام کو امیدوار بنایا گیا ہے۔ وہ پارٹی کی تجربہ کار لیڈر ہیں اور ریاست میں قبائلی برادری میں ان کی اچھی گرفت سمجھی جاتی ہے۔ ان کی نامزدگی کے ذریعے پارٹی قبائلی ووٹ بینک کو مضبوط کرنے کی کوشش کر رہی ہے۔

ہریانہ سے کرم ویر سنگھ بودھ کو ٹکٹ دیا گیا ہے۔ وہ دلت برادری سے تعلق رکھتے ہیں اور ریاست میں پارٹی کی تنظیمی مضبوطی کے لیے کام کر رہے ہیں۔ ہماچل پردیش سے انوراگ شرما کو منتخب کیا گیا ہے۔ وہ پارٹی کے نوجوان چہروں میں سے ایک ہیں اور ریاست کی سیاست میں سرگرم کردار ادا کر رہے ہیں۔

کانگریس پارٹی نے تمل ناڈو سے ایم کرسٹوفر تلک کو امیدوار بنایا ہے۔ وہ ریاست میں پارٹی کے اہم کارکن ہیں اور جنوبی ہندوستان میں کانگریس کی موجودگی کو مضبوط کرنے میں ان کا کردار اہم رہے گا۔ واضح رہے کہ یہ راجیہ سبھا کے یہ انتخابات 16 مارچ کو ہونے ہیں اور ان میں کئی ریاستوں کی کل 37 نشستیں داؤ پر لگی ہوئی ہیں۔