سینئر کانگریس لیڈر شنکرنارائنن کے انتقال پر سونیا گاندھی کا اظہارِ غم

سینئر کانگریس لیڈر اور سابق گورنر کے شنکرنارائنن کے انتقال پر کانگریس صدر سونیا گاندھی نے اظہارِ غم کرتے ہوئے کہا کہ یو ڈی ایف کنوینر اور کئی ریاستوں کے گورنر کی شکل میں اور کیرالہ کے لیے ان کی خدمات کے لیے انھیں ہمیشہ یاد کیا جائے گا۔ ان کا انتقال پورے ملک کے لیے ناقابل تلافی نقصان ہے۔ کے. شنکرنارائنن کا جسد خاکی ان کی رہائش اور کانگریس پارٹی دفتر میں کچھ وقت کے لیے رکھا جائے گا تاکہ عوام انھیں خراج عقیدت پیش کر سکیں۔ آج شام 5.30 بجے ان کی آخری رسومات ادا ہوں گی۔

واضح رہے کہ کیرالہ میں کانگریس کے سینئر لیڈر شنکرنارائنن کا 89 سال کی عمر میں اتوار کو پلکڑ واقع ان کی رہائش پر انتقال ہو گیا۔ انھوں نے دہائیوں پر مشتمل طویل سیاسی سفر کے دوران کئی ریاستوں کے گورنر کا عہدہ سنبھالا تھا۔ گزشتہ ڈیڑھ سال سے وہ کئی بیماریوں میں مبتلا تھے اور ان کا علاج چل رہا تھا۔

شنکرنارائنن نے مہاراشٹر، ناگالینڈ اور جھارکھنڈ کے گورنر کی شکل میں کام کیا تھا۔ انھوں نے گورنر کی شکل میں اروناچل پردیش، آسام اور گوا کا اضافی چارج بھی سنبھالا تھا۔ کانگریس کے سینئر لیڈر شنکرنارائنن چار بار رکن اسمبلی بھی رہ چکے تھے۔ وہ کیرالہ کی حکومت میں وزیر مالیات، پروڈکٹ ٹیکس اور محکمہ زراعت کے وزیر کے عہدہ پر رہ چکے تھے۔