وزیر اعظم صرف علامتی چیزوں پر ہی زور دے رہے ہیں:ادھیر رنجن چودھری

وزیرا عظم نریندرمودی کے ذریعہ 5اپریل کو رات نوبجے نومنٹ تک موم بتیوں اور چراغ روشن کرنے کی اپیل پر لوک سبھا میں کانگریس کے لیڈر ادھیر رنجن چودھری نے سخت تنقید کرتے ہوئے کہا ہے کہ وزیر اعظم نریندر مودی بنیادی مسائل پر توجہ دینے کے بجائے علامتی کاموں پر توجہ دے رہے ہیں۔

ادھیر رنجن چودھری نے کہا کہ اس وقت جو صورت حال ہے ان حالات میں ہماری ترجیحات میں مناسب ادویات، اسپتال، بستر، وینٹی لیٹر، ڈاکٹروں نرسوں کے لباس کی فراہمی کی ضرور ت ہے مگر مودی ان کاموں پر توجہ دینے کے بجائے موم بتی اور گھنٹی بجانے جیسے علامتی کاموں پر توجہ دے رہے ہیں۔

بہرام پور لوک سبھا سے رکن پارلیمنٹ ادھیررنجن چودھری نے کہا کہ یہ بات سمجھ سے بالاتر ہے کہ وزیرا عظم نریندر مودی کورونا وائرس کے خلاف لڑائی کے ذریعہ کیا پیغام دینا چاہتے ہیں۔ ادھیر رنجن چودھری نے کہا کہ ”لوگوں کے پاس اپنی جیب میں پیسہ نہیں ہیں، راشن نہیں ہے، لوگ نہیں جانتے کہ کل کیا کھانا ہے، اور وزیر اعظم نے موم بتیاں جلانے کے لئے کہا ہے۔ وہ ایک سیاسی تقریب کی منصوبہ بندی کررہے ہیں۔ادھیررنجن چودھری نے کہا کہ میں 5اپریل کو موم بتی نہیں جلاؤں گا اور میں وزیرا عظم مودی سے اپیل کرتا ہوں کہ نریندر مودی آپ کو اپنا سیاسی کھیل روکنا چاہئے۔

خیال رہے کہ وزیر اعظم نریندر مودی نے آج قوم کے نام اپنے پیغام میں کہا ہے کہ 5اپریل کو رات نو بجے کرونا کے خلاف جد وجہد میں اتحاد و یگانت کا مظاہرہ کرنے کیلئے ہم سب لائٹ بند کرکے نو منٹ تک موم بتی اور چراغ روشن کریں گے۔

ادھیر رنجن چودھری نے کہا کہ وزیر اعظم نریندر مودی ملک میں اتحاد کا پیغام عام کرنے کی ضرورت پر زور دے رہے ہیں۔جب کہ ملک میں اتحاد کی فضا کو کونقصان پہنچارہا ہے وہ سب جانتے ہیں۔اس ملک میں اتحاد کی کوئی کمی نہیں ہے۔ فرقہ وارانہ اور، تقسیم کی سیاست کرنے والوں پر لگام کسنے کی ضرورت ہے۔