کانگریس نے اپنے اراکین پارلیمنٹ کے لیے جاری کیا وہپ، 16 سے 18 اپریل تک ہونا ہے خصوصی اجلاس

کانگریس نے پارلیمنٹ کے خصوصی اجلاس کے لیے اپنے اراکین پارلیمنٹ کو 3 سطر کا وہپ جاری کیا ہے۔ پارٹی نے انہیں 16 سے 18 اپریل تک ایوان میں موجود رہنے کو کہا ہے۔ کانگریس پارٹی نے اپنے لوک سبھا اراکین کے لیے یہ وہپ اس وقت جاری کیا ہے، جب حکومت پارلیمانی بجٹ سیشن کے تحت ہو رہی اس سہ روزہ میٹنگ کے دوران خواتین ریزرویشن ایکٹ کو نافذ کرنے سے متعلق ترمیم اور حد بندی سے متعلق بل لانے کی تیاری میں ہے۔

کانگریس نے اپنے لوک سبھا اراکین سے کہا ہے کہ وہ تینوں روز ایوان کی کارروائی شروع ہونے سے لے کر ملتوی ہونے تک ایوان میں موجود رہیں۔ لوک سبھا میں اہم اپوزیشن پارٹی کا الزام ہے وزیر اعظم نریند مودی اور ان کی حکومت مغربی بنگال اور تمل ناڈو کے اسمبلی انتخابات میں فائدہ حاصل کرنے کے مقصد سے یہ قدم اٹھا رہی ہے۔

وزیر اعظم نریندر مودی کی قیادت والی حکومت نے 16 سے 18 اپریل تک 3 روز کا خصوصی اجلاس بلایا ہے۔ اس دوران خواتین ریزرویشن ایکٹ میں مجوزہ ترامیم پر غور و خوض کرنے اور انہیں منظور کرنے کے لیے پیش کیے جانے کا امکان ہے۔ رپورٹس کے مطابق گزشتہ بدھ (8 اپریل) کو ان مسودہ بلوں کو منظوری دے دی جن کا مقصد 2029 کے پارلیمانی انتخاب سے قبل خواتین کے لیے ریزرویشن نافذ کرنا اور لوک سبھا سیٹوں کی تعداد بڑھا کر 816 کرنا ہے۔ ان میں سے 273 سیٹ خواتین کے لیے محفوظ ہوں گی۔

دوسری جانب بی جے پی نے بھی اپنے اراکین پارلیمنٹ کو 3 سطر کا وہپ جاری کر ان سے جمعرات سے شروع ہونے والے پارلیمنٹ کے توسیعی بجٹ سیشن کے دوران اپنے اپنے ایوان میں موجود رہنے کو کہا ہے۔ بی جے پی نے اپنے تمام اراکین پارلیمنٹ کو بھیجے پیغام میں کہا کہ ’’16 سے 18 اپریل 2026 یعنی آئندہ جمعرات سے ہفتہ تک لوک سبھا اور راجیہ سبھا میں بی جے پی کے تمام اراکین کو 3 سطر کا وہپ جاری کیا جا رہا ہے۔ تمام مرکزی وزراء اور اراکین پارلیمنٹ سے گزارش ہے کہ وہ مذکورہ تینوں تاریخوں پر ایوان میں موجود رہیں۔ ایوان میں موجودگی لازمی ہے۔ کوئی چھٹی منظور نہیں کی جائے گی۔ اراکین سے گزارش ہے کہ وہ وہپ پر سختی سے عمل کریں اور ایوان میں اپنی بلا تعطل موجودگی کو یقینی بنائیں۔‘‘