’آیوشمان بھارت‘ کے تحت بريسٹ سرجری کرانے والی خواتین کی تصاویر معاملہ، کانگریس کا بی جے پی حکومت پر شدید حملہ

مدھیہ پردیش میں آیوشمان بھارت اسکیم کے تحت بريسٹ سرجری کرانے والی خواتین کی تصاویر غیر اخلاقی طور پر اپ لوڈ کی جا رہی ہیں۔ روزنامہ ’دینک بھاسکر‘ کی رپورٹ کے مطابق، سرجری کے بعد خواتین کے چہروں اور بريسٹ کی تصاویر کو پورٹل پر اپ لوڈ کیا جا رہا ہے تاکہ کلیم پاس ہو سکے۔ اس بارے میں کانگریس رہنما رندیپ سرجے والا نے سخت ردعمل ظاہر کیا ہے اور مرکزی وزیر صحت جے پی نڈا سے چند اہم سوالات کیے ہیں۔ انہوں نے پوچھا کہ آیا نڈا اس معاملے کا نوٹس لیں گے؟ اور کیا ان تصاویر کو ڈلیٹ کیا جائے گا؟

اس خبر کے منظرعام پر آنے کے بعد ڈاکٹرز نے بھی اس پر اعتراض اٹھایا ہے۔ ان کا کہنا ہے کہ یہ عمل خواتین کے عزت و احترام کے خلاف ہے اور ان کے حقوق کی پامالی ہے۔ وہ اس معاملے کو فوری طور پر روکنے کی تجویز دے رہے ہیں، تاکہ خواتین کی ذاتی معلومات کی حفاظت ہو سکے۔

کانگریس کا کہنا ہے کہ یہ سب کچھ بی جے پی حکومت کے زیرانتظام ہو رہا ہے اور اس پر بی جے پی کے سربراہ جے پی نڈا سے جواب طلب کیا ہے۔ کانگریس رہنماؤں کا کہنا ہے کہ مدھیہ پردیش حکومت اس معاملے میں غیر سنجیدہ ہے اور اس پر فوری کارروائی ہونی چاہیے۔

اس معاملے نے آیوشمان بھارت اسکیم کی ساکھ کو سوالات کے دائرے میں لا کھڑا کیا ہے اور عوامی سطح پر اس کی شفافیت اور خواتین کی ذاتی آزادی پر سوالات اٹھ رہے ہیں۔