شہریت ترمیمی بل امتیازی سلوک کا آئینہ دار: جماعت اسلامی

لکھنؤ: جماعت اسلامی ہند حلقہ اترپردیش مشرق نے لوک سبھا میں شہریت ترمیمی بل کے پاس ہونے پر منگل کو اپنی تشویس کا اظہارکرتے ہوئے اسے آئین ہند کی روح کے خلاف قرار دیا ہے۔

جماعت اسلامی حلقہ اترپردیش مشرق کے امیر ڈاکٹر ملک محمد فیصل فلاحی نے شہریت ترمیمی بل پر اپنے تحفظات کا اظہار کرتے ہوئے کہا کہ ہمارا آئین مذہب، ذات پات یا رنگ ونسل کی بنیاد پر اپنے شہریوں کے درمیان تفریق کی اجازت نہیں دیتا۔پارلیمنٹ سے منظور شدہ یہ بل آئین ہند کی روح کے عین مخالف ہے۔

ڈاکٹرملک نے کہا کہ یہ بل طبقات کے درمیان امتیازی سلوک کا آئینہ دار اور ایک تکثیری‘ سیکولر اور جمہوری قوم کی حیثیت سے ہندوستا ن کے اُس بنیادی نظریہ کے خلاف ہے جو ہمارے آئین میں درج ہے۔ اس بل سے آئین کے بنیادی ڈھانچے کو زک پہنچے گا۔
لوک سبھا سے اس بل کے منظور ہوجانے کے بعد بھی امیر حلقہ نے امید کا اظہار کیا کہ وطن عزیز کی تمام سیکولر پارٹیاں پوری قوت سے راجیہ سبھا میں اس بل کے خلاف اپناحق استعمال کریں گی اور پاس نہ ہونے دیں گی۔

قابل ذکر ہے کہ جماعت کے ذمہ داران نےامن پسند تنظیموں وانصاف پسند سربراہوں کے ذمہ داران سے ملاقاتیں کر کے اس بل کے منفی نکات پر تبادلہ خیال کرتے ہوئے ان سے پارلیمنٹ میں اس بل کی مخالفت میں ووٹ کرنے کی اپیل کی تھی تاکہ یہ بل قانون نہ بن سکے۔