مالیگاؤں میں 15 بزرگ شعرائے کرام کے اعزاز میں تقریب کا انعقاد

ممبئی: شہر ممبئی سے تقریباً 300 کلو میٹر کے فاصلہ پر واقع مالیگاؤں کو پاورلوم صنعت کے حوالہ سے مانچسٹر تو کہا ہی جاتا ہے، ساتھ ہی علم و ادب کا گہوارہ بھی تسلیم کیا جاتا ہے۔ یہاں مزدور سے لے کر صاحب ثروت افراد تک شعر و ادب سے نہ صرف دلچسپی رکھتے ہیں بلکہ اس فن کی قدر دانی میں پیش پیش رہتے ہیں۔

گزشتہ دنوں مالیگاؤں شہر میں ایک انوکھی تقریب کا انعقاد عمل میں آیا جس میں 15 معروف مقامی شعرائے کرام، جن کی عمر 65 سال سے زیادہ ہے، ان کے اعزاز میں ایک تہنیتی و اعترافی تقریب کا انعقاد کیا گیا۔ ان شعرائے کرام کی خدمت میں اعترافیہ کے ساتھ تحائف پیش کر کے اس تقریب کو یادگار بنایا گیا۔

مشہور شاعر اور استاد الشعراء مرحوم ادیب مالیگانوی کے نام سے منسوب اس تقریب کا انعقاد ’سیف نیوز‘ نامی ادارے کی جانب سے عمل میں آیا۔ منتظمین و شرکاء نے شعر و ادب کی خدمت میں عمر کا ایک طویل حصہ صرف کرنے پر بزرگ شعراء کے اعزاز و اکرام کو سعادت مندی قرار دیا۔ جن بزرگ شعراء کی ادبی خدمات کا اعتراف کیا گیا، ان میں ڈاکٹر اشفاق انجم، انیس نیّر، ظہیر قدسی، قطب الدین راہی، مختار یوسفی، اقبال نذیر، احمد شناور، پروفیسر سلیم قیصر، ڈاکٹر نعیم اختر، متین شہزاد، عادل فاروقی، اعظم علی ممنون، نجمی ابن جاوید اور ادریس وارثی شامل ہیں۔ ان میں بیشتر شعراء اکرام محنت کش، مزدوری اور چھوٹے پیشہ سے وابستہ ہیں۔ اس کے باوجود خاموشی سے شعر و داب کی خدمت انجام دینے میں مصروف ہیں۔ عمر کے آخری پڑاؤ میں معاشی جدوجہد کے ساتھ شعر و ادب کی خدمت کرنا یقیناً قابل رشک عمل ہے۔