مرکزی حکومت نے ریلوے ملازمین کو دیا دیوالی کا تحفہ، 78 دن کا بونس فراہم کرنے کا اعلان

نئی دہلی: اطلاعات و نشریات کے وزیر انوراگ ٹھاکر نے بدھ کے روز ایک پریس کانفرنس کی اور مرکزی کابینہ میں لئے گئے فیصلوں کی معلومات فراہم کی۔ انہوں نے بتایا کہ مودی حکومت نے ریلوے ملازمین کو دیوالی کا بڑا تحفہ دیا ہے۔ کابینہ اجلاس میں لئے گئے فیصلوں پر معلومات دیتے ہوئے انوراگ ٹھاکر نے کہا کہ ریلوے کے 11.27 لاکھ ملازمین کو 1832 کروڑ روپے کا ’پروڈکٹیوٹی لنکڈ بونس‘ فراہم کیا جائے گا۔ ہر ملازمین کو 78 دنوں کا بونس فراہم کیا جائے گا اور اس کی زیادہ سے زیادہ حد 17951 روپے ہوگی۔

خیال رہے کہ ریلوے نے گزشتہ سال بھی اپنے ملازمین کو 78 دن کا بونس فراہم کیا تھا۔ دراصل ایک ملازم کو 30 دن کے حساب سے 700 ہزار روپے بونس فراہم کیا جاتا ہے، اس طرح 78 دنوں کا بونس 17951 روپے بنتا ہے۔ خیال رہے کہ حال ہی میں حکومت نے مرکزی ملازمین کے لئے مہنگائی بھتہ میں 4 فیصد کے اضافہ کا اعلان کیا تھا۔ اس کے علاوہ سرکاری پنشنرز کے لئے بھی 4 فیصد مہنگائی راحت یعنی ڈی آر فرہم کی گئی تھی۔

پی آئی بی کے ڈی جی ستیندر پرکاش نے ٹوئٹ کر کے اطلاع دی ’’کابینہ نے مالی سال 2021-22 کے لیے ریلوے ملازمین کو 78 دنوں کے برابر کارکردگی سے منسلک بونس کی ادائیگی کو منظوری دی ہے۔ تقریباً 11.27 لاکھ نان گزیٹیڈ ریلوے ملازمین کو پی ایل بی کی رقم ادا کر دی گئی ہے۔‘‘

کابینہ اجلاس کے دوران آئل مارکٹنگ کمپنیوں کے لئے ون ٹائم گرانٹ بھی منظور کی گئی ہے۔ مرکزی وزیر نے کہا کہ پوری دنیا میں ایل پی جی کی قیمتیں بڑھ رہی ہیں۔ پبلک سیکٹر انڈرٹیکنگز کی آئل مارکیٹنگ کمپنیوں کو 22000 کروڑ روپے کی یک وقتی گرانٹ دی گئی ہے تاکہ بڑھتی ہوئی قیمتوں کا بوجھ عام لوگوں پر نہ پڑے۔