ایودھیا میں رام مندر تعمیر کے لیے ٹرسٹ بنانے کا عمل شروع

مرکزی حکومت نے ایودھیا میں رام مندر کی تعمیر کی دیکھ ریکھ کے لیے ٹرسٹ کی تشکیل کا عمل شروع کر دیا ہے۔ سپریم کورٹ نے ایودھیا معاملہ پر مالکانہ حق کو لے کر دیئے گئے فیصلہ میں اس کا حکم دیا تھا۔ وزارت داخلہ اور خارجہ کے اعلیٰ افسران ٹرسٹ کی تشکیل اور اس کے قوانین کو طے کرنے کے علم کا حصہ ہوں گے۔

ذرائع کے مطابق حکومت سپریم کورٹ کے ایودھیا پر فیصلہ کا مطالعہ کر رہی ہے اور نوکرشاہوں کی ایک ٹیم تکنیکی حصوں اور باریکیوں کو دیکھ رہی ہے۔ ذرائع نے کہا کہ اس معاملے میں حکومت اٹارنی جنرل کے. کے. وینوگوپال جیسے سینئر ماہر قانون سے صلاح و مشورہ کرے گی۔

ایک سینئر افسر نے کہا کہ ’’وزارت قانون اور اٹارنی جنرل سے رائے لی جائے گی کہ ٹرسٹ کی تشکیل کیسے کی جائے۔‘‘ ہفتہ کے روز دیئے گئے تاریخی فیصلہ میں سپریم کورٹ کے پانچ ججوں کی بنچ نے اتفاق رائے سے فیصلہ سنایا کہ متنازعہ 2.77 ایکڑ زمین مندر تعمیر کے لیے رام للا کو دی جائے گی۔

چیف جسٹس رنجن گگوئی کی صدارت میں بنچ نے حکومت کو اس کے لیے ٹرسٹ قائم کرنے کے لیے تین مہینے کا وقت دیا۔ مسلم فریق کو مسجد تعمیر کے لیے ایک متبادل جگہ پر 5 ایکڑ زمین دینے کا حکم دیا گیا ہے۔