پارلیمنٹ LIVE: لوک سبھا کی میں انڈسٹریل ریلیشن کوڈ ترمیمی بل پیش، اپوزیشن نے کی مخالفت

لوک سبھا میں این سی پی (ایس پی) کی رکن پارلیمنٹ سپریہ سسولے نے کہا کہ وہ سرمایہ داری کے خلاف نہیں ہیں لیکن مزدوروں کے مفادات کا تحفظ ضروری ہے۔ انہوں نے کہا کہ ہر مزدور ہندوستانی ہے اور ہر ہندوستانی کو حقوق حاصل ہیں۔ ان حقوق کے تحفظ کے لیے وہ ہمیشہ لڑیں گے۔

کانگریس کے رکن پارلیمنٹ راجیو شکلا نے راجیہ سبھا میں مصنوعی ذہانت پر مبنی ڈیپ فیک ویڈیوز کا معاملہ اٹھاتے ہوئے اسے سماج کے لیے سنگین خطرہ قرار دیا۔ شونیہ کال کے دوران انہوں نے کہا کہ آج کوئی بھی شخص محض ایک ایپ ڈاؤن لوڈ کر کے کسی کی آواز اور چہرہ نقل کرتے ہوئے من گھڑت ویڈیو تیار کر سکتا ہے، جو تیزی سے وائرل ہو جاتی ہے۔

راجیو شکلا نے کہا کہ اس وقت ملک میں ایسا کوئی مؤثر نوڈل نظام موجود نہیں جو ڈیپ فیک ویڈیوز کی بروقت نشاندہی کرے اور ان کے خلاف کارروائی کر سکے۔ انہوں نے اپنی مثال دیتے ہوئے بتایا کہ حال ہی میں پاکستان کے کچھ چینلوں نے ورلڈ کپ سے متعلق باتوں کو جوڑ کر ان کا جعلی ویڈیو تیار کیا، جس پر انہیں وضاحت جاری کرنی پڑی۔

انہوں نے کہا کہ انتخابات کے دوران سیاست دانوں کے بیانات کے جعلی ویڈیوز بھی بڑے پیمانے پر گردش کرتے ہیں، جس سے عوام کا اصل ویڈیوز پر اعتماد کمزور ہو رہا ہے۔ راجیو شکلا کے مطابق ویڈیو وائرل ہونے کے بعد تردید جاری کرنے سے پہلے ہی نقصان ہو چکا ہوتا ہے، اس لیے فوری کارروائی کے لیے ایک نوڈل ایجنسی قائم کی جانی چاہیے۔

لوک سبھا کی کارروائی دوپہر 12 بجے دوبارہ شروع ہونے کے بعد ایوان میں فہرست شدہ امور لیے گئے اور مرکزی وزیر محنت منسکھ منڈاویا نے انڈسٹریل ریلیشن کوڈ ترمیمی بل ایوان میں پیش کیا۔ انہوں نے کہا کہ حکومت ایک مختصر ترمیم لے کر آئی ہے اور ایوان سے گزارش کی کہ بل پر غور کر کے اسے منظور کیا جائے۔ اپوزیشن کی جانب سے کے سریش نے بل کی مخالفت کرتے ہوئے کہا کہ یہ مزدوروں کے مفاد میں نہیں ہے۔

راجیہ سبھا میں قائد حزب اختلاف اور کانگریس صدر ملکارجن کھڑگے نے اوڈیشہ کے ایک آنگن واڑی مرکز میں دلت خاتون ہیلپر کے ساتھ ذات پات کی بنیاد پر امتیاز کا معاملہ اٹھایا۔ انہوں نے بتایا کہ اس خاتون کے ہاتھ سے تیار کیا گیا کھانا ایک مخصوص برادری کے افراد نے اپنے بچوں کو دینے سے انکار کر دیا، جس کے باعث گزشتہ 3 ماہ سے آنگن واڑی مرکز کا بائیکاٹ جاری ہے۔

کھڑگے نے کہا کہ یہ محض ایک مقامی تنازع نہیں بلکہ دلت برادری کے ساتھ امتیازی سلوک کی واضح مثال ہے، جس کا براہ راست اثر بچوں کی غذائیت اور ابتدائی تعلیم پر پڑ رہا ہے۔ انہوں نے اسے آئین کے آرٹیکل 21 اے اور آرٹیکل 47 کی خلاف ورزی قرار دیتے ہوئے کہا کہ ریاست پر بچوں کی تعلیم اور صحت کی بہتری کی ذمہ داری عائد ہوتی ہے، لیکن ایسے واقعات ان آئینی ذمہ داریوں کو کمزور کرتے ہیں۔

انہوں نے مطالبہ کیا کہ ذات پات کی بنیاد پر کسی بھی قسم کے امتیاز یا ظلم و ستم کے واقعات میں فوری اور سخت کارروائی کی جائے اور ذمہ دار افراد کے خلاف قانون کے مطابق قدم اٹھائے جائیں۔ ان کے بیان کے بعد ایوان میں ہنگامہ اور نوک جھونک بھی دیکھنے کو ملی۔

پارلیمنٹ کے بجٹ اجلاس میں جمعرات کو ایک بار پھر ہنگامہ آرائی دیکھنے کو ملی۔ لوک سبھا کی کارروائی شروع ہوتے ہی اپوزیشن ارکان پلے کارڈز لے کر ایوان کے وسط میں پہنچ گئے اور نعرے بازی شروع کر دی۔ شور شرابے کے سبب ایوان کی کارروائی متاثر ہوئی اور اسے دوپہر 12 بجے تک کے لیے ملتوی کرنا پڑا۔ ایوان کی صدارت کرشنا پرساد تنیٹی کر رہے تھے، تاہم اپوزیشن کے احتجاج کے باعث کارروائی آگے نہیں بڑھ سکی۔

ادھر راجیہ سبھا کی کارروائی کا آغاز نسبتاً پُرسکون انداز میں ہوا، مگر وقفہ صفر کے دوران راجیہ میں قائد حزب اختلاف ملکارجن کھڑگے نے اوڈیشہ میں ایک دلت شخص کے ساتھ غیر انسانی سلوک کا معاملہ اٹھایا۔ انہوں نے مدھیہ پردیش کے ایک پرانے واقعے کا بھی ذکر کیا، جس کے بعد ایوان میں ہنگامہ بڑھ گیا۔ حکومتی اور اپوزیشن ارکان کے درمیان نوک جھونک دیکھنے کو ملی۔