بی پی ایس سی-ٹی آر ای 4 تنازعہ: پولیس نے طلبا لیڈر خوشبو پاٹھک کو حراست میں لیا، وزیر تعلیم کا رد عمل بھی آیا سامنے

بہار پبلک سروس کمیشن (بی پی ایس سی) کے چوتھے مرحلے کے اساتذہ بھرتی امتحان یعنی ’ٹی آر ای 4.0‘ کے اشتہار سے متعلق آج (بدھ) پٹنہ میں احتجاجی مظاہرہ کی تیاری ہو رہی ہے۔ اسی دوران پولیس نے پٹنہ میں بڑا قدم اٹھاتے ہوئے ایک اہم طلبا لیڈر کو حراست میں لے لیا ہے۔ میڈیا رپورٹس کے مطابق بہٹا میں پولیس نے خوشبو پاٹھک کو حراست میں لیا ہے، جس کے بعد ٹی آر ای 4.0 معاملہ پر ناراض طلبا میں غم و غصہ کی لہر دوڑ گئی ہے۔

دراصل ٹیچر امتحان کے امیدواروں کا مارچ پٹنہ کالج سے بی پی ایس سی دفتر تک نکالا جانا تھا۔ اس دوران اس قسم کی کارروائی سے یہ پیغام دینے کی کوشش کی جا رہی ہے کہ پولیس کسی بھی طرح کے ہنگامے کی اجازت نہیں دینا چاہتی۔ بتایا جا رہا ہے کہ خواتین امیدوار بیلن اور تھالی لے کر احتجاج کرنے والی تھیں۔ احتجاج کی قیادت طلبا لیڈر سوربھ اور خوشبو پاٹھک دونوں کر رہے تھے۔ اطلاعات کے مطابق خوشبو آرا سے آ رہی تھیں، اسی دوران انہیں بہٹا میں ہی روک لیا گیا۔ پولیس انہیں بہٹا تھانے لے گئی ہے۔

’ٹی آر ای 4.0‘ کے لیے احتجاجی مظاہرہ کے دوران طلبا لیڈر کو حراست میں لیے جانے کے معاملے پر بہار کے وزیر تعلیم متھیلیش تیواری کا رد عمل بھی سامنے آیا ہے۔ انھوں نے کہا کہ ’’گزشتہ 4-3 دنوں سے ہم تمام امیدواروں سے صبر کی اپیل کر رہے ہیں۔ ہم نے کہا ہے کہ اس معاملے پر سنجیدگی سے غور کیا جا رہا ہے۔‘‘ وہ مزید کہتے ہیں کہ ’’ہمارے وزیر اعلیٰ نے محکمۂ تعلیم کو ہدایت دی ہے اور محکمۂ تعلیم اس کی تیاریوں میں مصروف ہے۔ ہم بی پی ایس سی سے بات چیت کر کے جلد ہی شیڈول جاری کرنے والے ہیں۔‘‘

متھلیش تیواری کا کہنا ہے کہ امیدواروں کو امتحان کی تیاری کرنی چاہیے کیونکہ آنے والے دنوں میں جلد ہی ان کا امتحان ہونے والا ہے۔ احتجاج کرنے سے کوئی فائدہ نہیں ہے، کیونکہ جس چیز کے ہونے کا عمل جاری ہے، اسی کے لیے احتجاج کرنا مناسب نہیں ہے۔ حالانکہ ساتھ ہی انھوں نے یہ بھی کہا کہ یہ ایک جمہوری ملک ہے، اس لیے کسی کو احتجاج کرنے سے روکا نہیں جا سکتا۔

وزیر تعلیم نے کہا کہ احتجاج کے پیچھے کون لوگ ہیں، جو امیدواروں کو بھڑکا رہے ہیں، اس کی خبریں بھی سامنے آ رہی ہیں۔ کوئی ممبئی سے آ رہا ہے اور کوئی کہیں اور سے آ رہا ہے، ہم اس کی بھی جانچ کر رہے ہیں۔ ہمارے بہار کے امیدواروں سے ایک بار پھر اپیل ہے کہ آپ ہمارے لیے بے حد قیمتی ہیں، آپ نے حکومت بنائی ہے، آپ امتحان کی تیاری میں لگ جائیں۔ حکومت آپ کے خوابوں کو حقیقت میں بدلنے جا رہی ہے۔ گھبرانے کی ضرورت نہیں ہے۔