بی جے پی کے راجہ اقبال سنگھ دہلی کے میئر منتخب، پارٹی کی دو سال بعد ایم سی ڈی میں واپسی

دہلی میں میئر اور ڈپٹی میئر کے انتخاب میں بی جے پی نے میدان مار لیا۔ بی جے پی کے راجہ اقبال سنگھ نے 133 ووٹ حاصل کر کے دہلی کے میئر کا عہدہ جیتا ہے۔ راجہ اقبال سنگھ نے اس جیت کے بعد کہا کہ دہلی کی عوام نے انہیں شہر کی مشکلات حل کرنے کی ذمہ داری دی ہے۔

انہوں نے مزید کہا کہ عام آدمی پارٹی (عآپ) نے پہلے ہی اپنی شکست تسلیم کر لی ہے اور اب بی جے پی نے یہ عہد کیا ہے کہ وہ شہر میں پچھلے دو سالوں سے رکے ہوئے کاموں کو مکمل کرے گی اور کرپشن کو ختم کرے گی۔

دوسری طرف، عآپ کی سابق میئر، شیلی اوبیرائے اور رہنما مکیش گوئل نے ایک پریس کانفرنس میں انتخاب کا بائیکاٹ کرنے کی بات کی تھی اور بی جے پی پر الزام عائد کیا تھا کہ اس نے جمہوری عمل کا مذاق بنایا ہے۔

کانگریس کی جانب سے، مندیپ سنگھ نے میئر اور اریبہ خان نے ڈپٹی میئر کے عہدوں کے لیے اپنے نامزدگی فارم جمع کرائے تھے، لیکن وہ ناکام رہے۔ مجموعی طور پر، دہلی کے ایم سی ڈی میں کل 250 نشستیں ہیں، جن میں سے 238 فعال ہیں، باقی 12 نشستیں خالی ہیں۔ بی جے پی کے پاس اب 117 نشستیں ہیں، جبکہ عآپ کی نشستوں کی تعداد 113 ہے۔ کانگریس کے پاس 8 نشستیں ہیں۔

میئر کے انتخاب میں 238 وارڈز کے علاوہ 10 ممبران پارلیمنٹ اور 14 ممبران اسمبلی بھی شامل ہوئے، جن میں سے 11 بی جے پی اور 3 عآپ کے ممبران تھے۔

اجلاس کے ایجنڈے میں لالہ لاجپت رائے روڈ کا نام بدل کر بوڈو رہنما اپیندر ناتھ برہم روڈ رکھنے، ایم سی ڈی ملازمین کی صحت سکیم کا تجزیہ اور خستہ حال عمارتوں کو گرانے جیسے اہم مسائل شامل ہیں۔