دہلی میونسپل کارپوریشن میں بی جے پی کی جیت، پرویش واہی نئے میئر منتخب

نئی دہلی: دہلی میونسپل کارپوریشن کے میئر کے انتخاب میں بھارتیہ جنتا پارٹی نے کامیابی حاصل کرتے ہوئے اپنے امیدوار پرویش واہی کو میئر منتخب کرا لیا۔ بدھ کو ہونے والی ووٹنگ اور اس کے بعد گنتی کے عمل میں بی جے پی کو واضح برتری حاصل رہی، جس کے نتیجے میں پرویش واہی بغیر کسی خاص مقابلے کے اس عہدے پر فائز ہو گئے۔

میئر کے اس انتخاب میں کل 165 ووٹ ڈالے گئے، جن میں سے 156 ووٹ بی جے پی کے حق میں گئے، جبکہ کانگریس کے امیدوار حاجی ظریف کو صرف 9 ووٹ مل سکے۔ عام آدمی پارٹی کی جانب سے انتخاب میں حصہ نہ لینے کے فیصلے نے بھی بی جے پی کی راہ مزید آسان بنا دی، جس کے باعث انتخابی مقابلہ یک طرفہ نظر آیا۔

دہلی میونسپل کارپوریشن کے اس انتخابی عمل میں کل 273 ووٹرز شامل تھے، جن میں 249 منتخب کونسلر، ارکان پارلیمان اور دہلی اسمبلی کی جانب سے نامزد 14 اراکین شامل تھے۔ جیت کے لیے کم از کم 137 ووٹ درکار تھے، جو بی جے پی نے باآسانی حاصل کر لیے۔ پارٹی کے پاس پہلے ہی واضح عددی برتری موجود تھی، جس نے اس کامیابی کو تقریباً یقینی بنا دیا تھا۔

پرویش واہی روہنی ای وارڈ سے تین بار منتخب ہونے والے کونسلر ہیں اور اس وقت میونسپل کارپوریشن میں لیڈر آف ہاؤس کی ذمہ داری بھی سنبھال رہے تھے۔ بی جے پی نے 23 اپریل کو نامزدگی کے آخری دن انہیں میئر کے امیدوار کے طور پر اعلان کیا تھا۔ اسی کے ساتھ مونیکا پنت کو نائب میئر کے لیے امیدوار بنایا گیا تھا۔

نامزدگی داخل کرتے وقت پرویش واہی نے پارٹی قیادت کا شکریہ ادا کرتے ہوئے کہا تھا کہ وہ دہلی کو صاف، خوبصورت اور بہتر بنانے کے لیے پوری لگن کے ساتھ کام کریں گے۔ ان کے مطابق شہری سہولیات کو بہتر بنانا اور بنیادی ڈھانچے کو مضبوط کرنا ان کی ترجیحات میں شامل ہوگا۔

پرویش واہی کا تعلق راشٹریہ سویم سیوک سنگھ کی پس منظر سے بتایا جاتا ہے اور وہ روہنی علاقے سے تعلق رکھتے ہیں۔ میونسپل کارپوریشن انتخابات 2022 کے بعد سے وہ فعال کردار ادا کر رہے ہیں اور پارٹی کے اندر بھی ان کی تنظیمی صلاحیتوں کو سراہا جاتا رہا ہے۔ ان کے تجربے اور سیاسی پس منظر کو دیکھتے ہوئے پارٹی نے انہیں اس اہم ذمہ داری کے لیے موزوں قرار دیا۔

میئر کا عہدہ ایک سال کے لیے ہوتا ہے، اس دوران شہری انتظامیہ کو بہتر بنانا اور مختلف ترقیاتی منصوبوں کو آگے بڑھانا ان کی اہم ذمہ داری ہوگی۔ بی جے پی قیادت کو امید ہے کہ اس تقرری سے مرکز اور میونسپل کارپوریشن کے درمیان تال میل میں بہتری آئے گی، جس کا فائدہ دہلی کے شہریوں کو پہنچے گا۔