سرکاری تقاریب میں ’نان ویج‘ کی ہوگی ’نو انٹری‘! پارلیمنٹ میں بل پیش

سبزی اور گوشت کی لڑائی کو مزید طول دیتے ہوئے بی جے پی کے رکن پارلیمنٹ نے لوک سبھا میں ایک ایسا بل پیش کیا ہے جس میں مطالبہ کیا گیا ہے کہ سرکاری تقاریب میں ’نان ویج‘ کھانے پر پابندی عائد کر دی جائے۔ یہ بل 28 دسمبر کو لوک سبھا میں پیش کیا گیا اور پیش کرنے والے بی جے پی رکن پارلیمنٹ کا نام پرویش صاحب سنگھ ہے۔ مغربی دہلی سے بی جے پی کے رکن پارلیمنٹ نے جمعہ کے روز اس تعلق سے پرائیویٹ بل پیش کیا ہے۔ ان کا ماننا ہے کہ سرکاری تقاریب میں گوشت سے بنی چیزوں کو پیش نہیں کیا جانا چاہیے کیونکہ اس سے سبزی خور حضرات کے جذبات مجروح ہوتے ہیں۔

28 دسمبر کو پرویش ورما نے نان ویج کھانوں پر سرکاری تقاریب میں پابندی عائد کرنے کے علاوہ بھی تین دیگر پرائیویٹ ممبر بل پیش کیا۔ یہ تین دیگر بل قومی ترانہ بجنے پر لازمی طور سے کھڑا ہونے، مذہبی جذبات سے جڑے ناموں کے استعمال اور ساتویں سے دسویں درجہ تک ضمنی سبجیکٹ کی شکل میں ’ٹریڈیشنز اینڈ پریکٹیسز آف انڈیا‘ کو لازمی کرنے کا مطالبہ کیا ہے۔