’’بی جے پی لیڈردہلی سے راجستھان آکر جھوٹ پھیلاتے ہیں‘‘

جے پور: راجستھان کے وزیر اعلی اشوک گہلوت نے الزام لگایا ہے کہ بھارتیہ جنتا پارٹی (بی جے پی) کے رہنما دہلی سے آکر راجستھان میں جھوٹ پھیلاتے ہیں۔ وزیر اعلیٰ نے آج یہاں جاری ایک بیان میں کہا کہ ’’یہ عوام اچھی طرح سے سمجھتی ہے، یہی وجہ ہے کہ عوام نے شہری بلدیاتی انتخابات میں ان کے جھوٹے اور گمراہ کن پروپیگنڈوں کا بھرپور جواب دیا ہے، لیکن بی جے پی منفی سیاست سے باز نہیں آرہی ہے۔ ‘‘ان کا کہنا تھا کہ مرکزی وزیر اسمرتی ایرانی نے 7 فروری کو جے پور میں یہ جھوٹا الزام لگایا تھا کہ راہل گاندھی نے 10 دن میں قرض معافی کا وعدہ کیا تھا، لیکن وہ پورا نہیں ہوا۔ ایرانی نے حقائق کا مطالعہ نہیں کیا لہٰذا انہوں نے حقیقت میں غلط بیان دیا ہے۔

اشوک گہلوت نے کہا کہ 17 دسمبر2018 کووزیر اعلی کے عہدے کا حلف اٹھانے کے دو دن بعد 19 دسمبر کو انہوں نے پریس کانفرنس کرکے کسانوں کے قرض معافی کا اعلان کیاتھا۔ راجستھان حکومت نے اپنے ماتحت تمام کوآپریٹو اور لینڈ ڈیولپمنٹ بینکوں سے 20 لاکھ 56 ہزار کسانوں کے 30 نومبر 2018 تک کسانوں کے تمام بقایا فصل قرضوں کو معاف کردیا۔ ساتھ ہی پہلے کی بی جے پی حکومت کے ذریعہ کی گئی قرض معافی کے 6072 کروڑ روپئے کی ادائیگی بھی کانگریس حکومت نےکی۔ کانگریس حکومت نے کل 14 ہزار کروڑ روپے سے زائد کے کسانوں کے قرضے معاف کئے ہیں۔

وزیر اعلیٰ نے کہا کہ بی جے پی لیڈر یہ کہہ رہے ہیں کہ ریاستی حکومت نے ویٹ بڑھارکھا ہے۔ جب یوپی اے حکومت مرکز میں تھی تو بین الاقوامی مارکیٹ میں خام تیل کی قیمت 130 ڈالرفی بیرل تھی، لیکن پٹرول اور ڈیزل کی قیمتیں 70 روپے سے کم رہتی تھیں۔ مودی سرکار کے دور حکومت میں خام تیل کی قیمت 50 ڈالر فی بیرل کے آس پاس ہیں تب بھی پٹرول اور ڈیزل کی قیمت 90 روپے کے آس پاس کیوں ہے؟ مسٹر گہلوت نے کہا کہ ریاستی حکومت 10 دن پہلے ہی ویٹ میں دوفیصد کی کٹوتی کی ہے۔ مرکزی حکومت کو بھی بجٹ میں مرکزی ٹیکسوں کو کم کرنے کی ہمت دکھانی چاہئے تھی۔